ვაჟა ჩიტაშვილმა ფრაქცია შეიცვალა

ჩიტაშვილმა ფრაქცია ”ნაციონალების” დატოვებასა და ფრაქცია ”რეგიონებში” გადასვლის შესახებ განცხადება ერთდროულად დაწერა, თუმცა როგორც თავად ”სამხრეთის კარიბჭესთან” განაცხადა, ინფორმაცია მხოლოდ ფრაქცია “ნაციონალებიდან” წამოსვლის შესახებ გავრცელდა.

”ბევრი მირეკავს, რატომ დავტოვე ფრაქცია. იმით თუ სად გადავედი, რატომღაც არავინ დაინტერესდა”, - გვითხრა ჩიტაშვილმა.

მისი განმარტებით, ”ერთიან ნაციონალურ მოძრაობას” სამი ფრაქცია აქვს: ”ნაციონალები”, ”მაჟორიტარები” და ”რეგიონები”. ამდენად, მან იმავე პარტიის სხვა ფრაქციაში გადაინაცვლა. ასე იმიტომ არჩია, რომ ფრაქცია ”რეგიონებში” არიან ასპინძის მაჟორიტარი დეპუტატი ტარიელ ლონდარიძე და ადიგენის მაჟორიტარი დეპუტატი ზურაბ ჩილინგარაშვილი.

”სხდომები ერთდროულად იქნება, ერთად წავალთ და მოვალთ, ვისაუბრებთ და მუნიციპალიტეტების ამბებს ერთდროულად დავგეგმავთ. ამიტომ ვამჯობინე ფრაქცია ”რეგიონებში” ყოფნა”, - აცხადებს ჩიტაშვილი.

[თამუნა უჩიძე, ახალციხე]