დღეს, 5 ივლისს, ნინოწმინდაში მომხდარი ქურდობისა და ყაჩაღობის საქმეზე ჩვენება ხუთმა მოწმემ მისცა, მეექვსე კი არ გამოცხადდა. მათი დაკითხვა დაზარალებულის უფლებამონაცვლის, გარდაცვლილის შვილის ბაგრატ სააკიანის ჩვენებით დაიწყო.
13 იანვრის ღამეს, როცა მის სახლში ყაჩაღობა და მკვლელობა მოხდა, თავად ერევანში ნათესავთან იყო. მომხდარის შესახებ სააკიანმა სომხეთში ტელეფონით გაიგო. ჩამოსულს მეუღლე ნაცემი დახვდა, ამბობს რომ სახე ჰქონდა დაზიანებული: „თავს დაესხნენ, გაუკოჭიათ. მანამდე კარზე ქალს დაუკაკუნებია. ჩემ მეღულეს უთქვამს ფული გინდათ, თუ ოქრო, წაიღეთო. იმათ უპასუხიათ, ფულსაც წავიღებთ და ყველაფერსო“.
სააკიანის თქმით, იმ ღამეს სახლში ფული არ ჰქონდათ, თუმცა ოქრო იყო: „არაფერი წაუღიათ. ვერ მოასწრეს. პაროლი ჰქონდათ, როგორც კი დაურეკავდნენ, უნდა წასულიყვნენ. თან ჩემ სახლთან სულ მოძრაობაა, ხან ტაქსი მოდის, ხან რა“.
ბაგრატ სააკიანს, როგორ თავად ამბობს, ნინოწმინდაში რესტორანი და მაღაზია აქვს. თავად ყოველ დღე ნინოწმინდის ცენტრში ფულს ახურდავებს. ამბობს, რომ მას ვიღაც უთვალთვალებდა.
„ჩემი მანქანის გვერდით იდგა მანქანა, მძღოლს თავი ჰქონდა გამოყოფილი, უჩვეულოდ იყურებოდა ჩემ მანქანაში“, – იხსენებს სააკიანი და ამატებს, რომ დახურდავებისას ფულის ნაწილი თან, ნაწილი კი სწორედ მანქანაში ჰქონდა, დღის განმავლობაში კი სახლიდან 10–12 ათასი გამოჰქონდა.
სააკიანს გამოძიებისას მიცემულ ჩვენებაში იმის შესახებ, რომ მას უთვალთვალებდნენ, ნათქვამი არ აქვს. ამის შესახებ სასამართლოში თავად განაცხადა და ეს ასე ახსნა: „მაშინ განერვიულებული ვიყავი, ეს მერე ნელ–ნელა მეხსიერებაში აღვიდგინე“.
სააკიანის თქმით, მის მეუღლეს გამოძიება სავარაუდო დამნაშავეების ფოტოებს პერიოდულად უჩვენებდა. იქიდან ერთი ქალი ამოიცნო: „ეს კაციც იყო“ ,– მიუთითა დარბაზში მჯდომ ერთ–ერთ ბრალდებულზე თემურ ბ–ზე სააკიანმა.
მის შემდეგ ჩვენება ნინოწმინდაში ერთ–ერთმა ტაქსის მძღოლმა, სააკიანის მეზობელმა და სოფელ სპასოვკაში მცხოვრებმა ორმა მამაკაცმა მისცა.
ტაქსის მძღოლმა სააკიანის მეზობელი იმ ღამეს სახლში მიიყვანა. მან სასამართლოში განაცხადა, რომ ამ დროს სააკიანების სახლთან „ზამასკიანი“ მანქანა შენიშნა.
როგორც წინა სასამართლო პროცესზე ერთ–ერთმა ბრალდებულმა ივანე გ–მ ჩვენებაში თქვა, სააკიანის სათვალთვალოდ მისი „დაშკურკული“ მანქანით იყვნენ და ბრალდებულები „ვალუტჩიკის“ სახლთან სწორედ ამ მანქანიდან ჩამოსვა.
„ზამასკიანი“ მანქანა რომ იდგა იმ ოჯახთან, რომელიც 13 იანვრის ღამეს დააყაჩაღეს, ეს სასამართლო დარბაზში სააკიანების მეზობელმაც დაადასტურა.
მათ შემდეგ ჩვენება სპასოვაკში მცოხვრებმა იმ ორმა პირმა მისცა, რომლებიც ერთ–ერთ ბრალდებულს ივანე გ–ს თოვლში ჩარჩენილი მანქანის ამოყვანაში დაეხმარნენ. ივანე გ–მ თავის ჩვენებაში განაცხადა, რომ მას შემდეგ, რაც „ვალუტჩიკის“ სახლიდან გამოსული თემურ ბ. და ქეთევან ხმალაძე მას მანქანაში ჩაუსხდნენ, სპასოვკისკენ წავიდნენ, თუმცა აქ მანქანა გზაში გაიჭედა, ამიტომ თავად იქ დარჩენა მოუწია.
სპასოვკელი მერაბ მიქელაძე და ნიკოლაი კუბლაკოვი სასამართლოში მოყვნენ თუ როგორ დაეხმარნენ ივანე გ–ს მანქანის თოვლიდან ამოყვანაში: „გვითხრა, კარტოფილი უნდა გვეყიდა, აქ იმიტომ ვართ ჩამოსულიო“.
ასევე, ორივე მათგანმა განაცხადა სასამართლოში, რომ მანქანას „ზამასკა“ ჰქონდა. გაკეთებული.
„პროკურატურაში ნამეცადინები ჰყავთ მოწმეები, რომ რაც შეიძლება ბევრჯერ ახსენონ ეს „ზამასკა“. დღეს არცერთ მოწმეს მნიშვნელოვანი არაფერი უთქვამს“, – ამბობს ქეთევან ხმალაძის ადვოკატი ირაკლი ბარძიმაძე.
შეგახსენებთ, ნინოწმინდაში მომხდარი მკვლელობის საქმეზე ჯგუფურ ყაჩაღობაში ბრალდებით ქეთევან ხმალაძე ხუთ პირთან ერთად 16 იანვარს დააკავეს.18 იანვარს ერთ–ერთი დაკავებული გირაოს სანაცვლოდ გაათავისუფლეს.
[თამუნა უჩიძე, ახალციხე]