ახალციხელი მხატვრების ნახატების გამოფენა გაიხსნა

გამოფენა-გაყიდვა, სატუმროს დარბაზში, დაახლეობთ ერთი საათია რაც გაიხსნა. ღონისძიებას, გარდა ადგილობრივი სტუმრებისა, ახალციხეში ფილმის გადასაღებად ჩამოსული უცხოელი დამთვალიერებლებიც ესწრებიან.

რამდენიმე დღეა, რაც ახალციხის ციხეში, ქართულ-რუსულ-ბრიტანულ-გერმანული პროექტის, ”ეპიკის” ფარგლებში, კომედიური ჟანრის ფილმისთვის სცენებს იღებენ. გადაღებები ახალციხის მუნიციპალიტეტის სხვადასხვა სოფლებშიც მიმდინარეობს.

„სტუმრებმა გამოთქვეს სურვილი ჩვენი შემოქმედება ენახათ. ქალაქში, სამწუხაროდ, საგამოფენო დარბაზი არ გვაქვს, სადაც მსგავს ღონისძიებებს გავმართავთ. ამიტომ, ადგილობრივი მხატვრების ნამუშევრები სასტუმროში გამოვფინეთ“, - გვითხრა ღონისძიების ორგანიზატორმა ნანა ნათენაძემ.

„ლომსიაში“, გარდა ნახატებისა, გამოფენილია სხვადასხვა სახის სუვენირები მაღაზია „მესხური ბრენდიდანაც“.

ღონისძიებაში ხუთი მხატვარი მონაწილეობს. ნათენაძის თქმით, აქ წარმოდგენილ მხატვრებს შორის ყველაზე მეტ ნახატს მხატვარი რეზო ხითარიშვილი ყიდის.

ხითარიშვილმა ხატვა 80-იანი წლებიდან დაიწყო და როგორც ამბობს, ხშირად მისი ნახატები საზღვარგარეთაც იყიდება: „ვყიდი შოტლანდიაში, გერმანიაში, თურქეთში... ამ ქვეყნებში არაერთ მხატვარს ვიცნობ. ჩემი ნახატები ყველაზე მეტად ავანგარდული ნიშნებით ხასიათდება, თუმცა, ვხატავ იმას და იმ ჟანრში, რისი მუზაც მომდის“.

„ლომსიას“ დარბაზში ადგილობრივი მხატვრების ნამუშევრები სამი კვირის განმავლობაში იქნება გამოფენილი. მათი ნახვა ნებისმიერ მსურველს შეეძლება.

[თამუნა უჩიძე, ახალციხე]