ახალციხეში ნახატები და ხალხური რეწვის ნიმუშები გამოფინეს

ახალციხის ქვედა ციხის ტერიტორიაზე ნებისმიერ მსურველს შეუძლია დაათვალიეროს და ასევე, შეიძინოს ხალხური რეწვის ოსტატების, ადგილობრივი მხატვრებისა და ვარძიის დედათა მონასტრის დედების მიერ შესრულებული ნამუშევრები.

აქ გამოფენილია თექა, ვიტრაჟი, ფაიფური, სამოსი, ჭურჭელი, სამკაულები, ხალიჩა–ფარდაგები და სუვენირები.

„გამოტანილი მაქვს ობობის ნახევარსაუკუნოვანი ქსელით გაკეთებული ნახატი, ასევე, აკრილის საღებავებით და გამომშრალი მცენარეებით შესრულებული ნამუშევარი. გამოვფინე ჩემი დახატული მესხური ზამთარიც“, – ამბობს მხატვარი ირმა მერაბიშვილი.

ახალციხის სამხატვრო სკოლის დირექტორის ნანა ნათენაძის თქმით, დღეს მათ ციხის ტერიტორიაზე მოსწავლეების მიერ შესრულებული საუკეთესო ნამუშევრები წარმოადგინეს: „ძირითადად ზეთში და გუაშში გაკეთებული ნახატები გამოვფინეთ“.

ხალხური რეწვის ოსტატმა მაია მაისურაძემ გასაყიდად ციხეზე თექის სამკაულები, ყელსაბამები, სამაჯურები, სუვენირები, ჩანთები, ჟილეტები, ხურჯინები და ჩოხები გასაყიდად გამოიტანა: „ჩემ ნამუშევრებს თბილისში ვყიდი, 12 წელია ამ საქმით ვარ დაკავებული“.

ახალციხის ციხეზე გამოფენა–გაყიდვა 19:00 საათამდე გაგრძელდება.









[მარიამ ბარძიმაძე, ახალციხე]