ახალციხის ციხეში ისევ გადაღებებია

ფილმში მოვლენები გამოგონილ ქვეყანაში ვითარდება. ფილმის მთავარ როლებს მეთიუ მაქფედიენი და მაიანა ბურინგი ასრულებენ.

საქართველოს მხრიდან ფილმის პროდუსერი ვლადიმერ კაჭარავაა, ბრიტანეთს მხრიდან მაიკ დაუნი და ტენ ტეილორი, ხოლო გერმანიის მხრიდან დანიელ ზუტა.

”ფილმს იღებს ინგლისელი რეჟისორი ბენ ხოპკინსი, დამდგემელი ოპერატორი გერმანელია, მეორე რეჟისორი კი ხორვატი. ასე, რომ ფილმის სტაფი საკმაოდ მრავალეროვანია”, - ამბობს წარმოების მენეჯერი დალი ნარიმანიძე .

ფილმის გადაღებები ახალციხიდან დაიწყო. გარდა ციხის ტერიტორიისა, ფილმისთვის სცენებს სოფელ ძველშიც იღებენ. გადაღებები დღეს დაიწყო და 19 იანვრამდე გაგრძელდება.

”გადაღებები15 იანვარს ახალციხეში, რაბათის ტერიტორიაზე დავიწყეთ, პარალელურად, მიმდინარეობს მოსახლეობის გადაღება სოფელ ძველშიც. ახალციხის შემდეგ ფილმის გადაღება საქართველოს სხვადასხვა კუთხეში გაგრძელდება ”, - განმარტავს დალი ნარიმანიძე.

ფილმის გადაღება 20 თებერვალს დასრულდება. ხოლო, მაყურებელი მას ტელეეკრანზე 2014 წელს იხილავს.

შეგახსენებთ, რომ ციხის ტერიტორიაზე გადაღო სცენები ბოლივუდმა, ფილმისთვის ”სხვა სამყარო”. ასევე, სტუდია “ჯი დი ეს”-მა დოკუმენტური ფილმისთვის ”დროის მანქანა”. ციხეში გადაიღო საიმიჯო კლიპი ანსმაბლმა ”სუხიშვილებმა” და ასევე, ახალციხის ციხის ტერიტორიაზე მიმდინარეობდა სოფო ნიჟარაძისა და ხუაკინ კორტესის ვიდეო-კლიპის გადაღებაც.



[თამარ თოთაძე, ახალციხე]