რას მოხმარდება ტენდერის შედეგად დაზოგილი თანხა ახალციხის სოფლებში

დღეს, 8 ივლისს ახალციხის მუნიციპალიტეტის საკრებულოს რიგით მე–10 სხდომა გაიმართა. ერთ – ერთი საკითხი „2016 წლის სოფლის მხარდაჭერის პროგრამის ფარგლებში განსახორციელებელი პროექტების პრიორიტეტების და სავარაუდო ღირებულებების ჩამონათვალის დამტკიცების თაობაზე“ 2016 წლის 29 თებერვლის N6 განკარგულებაში ცვლილების შეტანა იყო.

ახალციხის მუნიციპალიტეტის სოფლებში ტენდერების ჩატარების შედეგად 8.718 ლარი დაიზოგა, აღნიშნული თანხა სხვილისში სოფლის სახლის რეაბილიტაციის დასრულებას და ზიკილიაში ყოფილი კლუბის მიმდებარე ტერიტორიაზე გზის საყრდენი კედლის რეაბილიტაციას მოხმარდება.

„საყუნეთში სასოფლო–სამეურნეო მიწების შემოღობვის შედეგად სახელმწიფოს მიერ გამოყოფილ თანხაში დაიზოგა 1.268 ლარი, ნაოხრების სატუმბი სადგურის სარეაბილიტაციო სამუშაოების დროს 84 ლარი, წყალთბილის საბავშვო ბაღის რეაბილიტაციის შედეგად 3.742 ლარი, მინაძეში მდინარე მტკვარზე გადასასვლელი ხიდიდან და რიტუალების სახლიდან 208 ლარი, ხოლო ჭაჭარაქის სარწყავ არხზე დაიზოგა 3.416 ლარი“, – განაცხადა საკრებულოს სხდომაზე შესყიდვების სამსახურის უფროსმა ქეთი ინასარიძემ.

შეგახსენებთ, რომ 2016 წელს სოფლის მხარდაჭერის პროგრამის ფარგლებში ახალციხის მუნიციპალიტეტის სოფლებისთვის სახელმწიფო ბიუჯეტიდან 667.098 ლარი გამოიყო. ადგილობრივმა თვითმმართველობამ აღნიშნულ თანხას 195.000 ლარი დაამატა.

ამ ეტაპზე 51 პროექტიდან ტენდერი 32–ზე გამოცხადდა, 19–ზე კი საპროექტო სამუშაოები მიმდინარეობს.

[თინათინ ზაზაძე, ახალციხე]