ახალციხის ციხის აუზები წყლისგან დაცალეს

ახალციხის ზედა და ქვედა ციხეში მდებარე არაერთი სხვადასხვა ზომისა და ფორმის აუზებიდან წყალი ჯერ კიდევ დეკემბრის თვეში გაუშვეს, ამ დროისთვის წყალი არც შადრევნებში მოდის. მკაცრი კლიმატური პირობების გამო წყლის გაშვება სისტემაში გაზაფხულამდე არ იგეგმება.

„ძლიერ ყინვებში სისტემა რომ არ დაზიანებულიყო 18 დეკემბერს გამოვრთეთ“, - განმარტავს ციხის დირექტორი ბესიკ ბლიაძე.

7 ჰექატარზე მდებარე ციხეში 1,5 ჰექტარი ტერიტორია ნარგავებს უკავია. ციხის ადმინისტრაციაში გავრწმუნებენ, რომ მკაცრი კლიმატის გამო საფრთხე არც დეკორატიულ მცენარეებს ემუქრება. გამწვანების სპეციალისტები ამბობენ, რომ პოლონეთიდან და იტალიიდან ჩამოტანილი დეკორატიული ნერგები ყინვაგამძლე ჯიშებია. დეკორატიული ხეების უმეტესობა ფოთლოვანია. მუხა, ცაცხვი, ნეკერჩხალი და თხილი დაბალი ჯიშის ხეებია, რომლებიც სპეციალურად პარკების მშენებლობისთვისაა გათვალისწინებული.

„ხეების თითქმის 100 პროცენტი გახარებულია. კლიმატი საფრთხს არ უქმნის“, - ამბობს გამწვანების სპეციალისტი რეზო გიქოშვილი.

ახალციხის ციხის ტერიტორიის გამწვანებაზე ორი თანამშრომელი ზრუნავს. სპეციალისტები ამბობენ, რომ თანამშრომლების დამატება აუცილებელია, თუმცა ბიუჯეტის შემცირებს გამო ახალი თანამშრომლებს ვერ მიიღებენ.



[თინათინ ზაზაძე, ახალციხე]