ახალციხის ციხეზე საპირფარეშო ფასიანი გახდა

ახალციხის ციხის ადმინისტრაცია გადაწყვეტილებას იმ მოტივით ხსნის, რომ საპირფარეშოს მოვლა–შენახვა ძვირი ჯდება. ადმინისტრაციამ გადაწყვეტილება ახალციხის მერიასთან შეთანხმებით მიიღო.

„მერიისგან მივიღეთ დასტური“, – ამბობს ახალციხის ციხის საზოგადოებასთან ურთიერთობის სამსახურის უფროსი ლილი გოზალიშვილი და ამატებს, რომ სუბსიდიის შემცირების შემდეგ ციხე ყველა ხარჯს ვეღარ სწვდება, – „საპირფარეშოდან შემოსული თანხა ისევ საპირფარეშოს მოხმარდება“.

ახალციხის ციხის ქვედა ნაწილში შესვლა უფასოა. ციხის ამ ნაწილში ძირითადად მომსახურების ობიექტებია: სასტუმროები, რესტორნები, ბარები და ორი მაღაზია. მაღაზიებსა და ბარებს საპირფარეშო არ აქვთ. მათი მომსახურე პერსონალიც და კლიენტებიც ციხის საერთო საპირფარეშოთი სარგებლობდნენ. აქედან გამომდინარე, ბარებში და მაღაზიებში საპირფარეშოს ფასიანად ქცევა არ ხიბლავთ, თუმცა, კომენტარისგან თავს იკავებენ.

უფასო რჩება ის საპირფარეშო, რომელიც ზედა ციხეში მდებარეობს. თუმცა, ზედა ციხეში, სადაც ისტორიული ობიექტებია, შესვლა ფასიანია, ამდენად, ეს ქვედა ციხეში მომუშავეთა და დამსვენებელთათვის, გამოსავალი არ არის.



[ვარლამ წიკლაური, ახალციხე]