EMC და TDI რელიგიური ორგანიზაციების დაფინანსებას კვლევას იწყებენ

„ადამიანის უფლებების სწავლებისა და მონიტორინგის ცენტრსა“ (EMC) და „ტოლერანტობისა და მრავალფეროვნების ინსტიტუტში“ (TDI) აცხადებენ, რომ კვლევის მიზანია 2013 წელს და 2014 წლის დასაწყისში საქართველოს მართლმადიდებელი ეკლესიის და სხვა რელიგიური ორგანიზაციებისთვის სახელმწიფოს მიერ გადაცემული ფინანსებისა და სხვა მატერიალური სიკეთეების მასშტაბისა და მიზნობრიობის შესწავლა.

კვლევა, ბიუჯეტიდან პირდაპირი დაფინანსების წესით გადაცემული დაფინანსების გარდა, გააანალიზებს პრეზიდენტისა და მთავრობის სარეზერვო ფონდებიდან, ასევე ყველა მუნიციპალიტეტის ადგილობრივი ბიუჯეტიდან მართლმადიდებელი ეკლესიისთვის და სხვა რელიგიური ორგანიზაციებისთვის გადაცემული მატერიალური სიკეთეების ოდენობას, მიზნობრიობასა და დასაბუთებას.

„კვლევის შედეგები აჩვენებს თუ რა ტენდენციები და პრაქტიკა იკვეთება სახელმწიფოს მიერ რელიგიური ორგანიზაციების დაფინანსების კუთხით, განსახილველ პერიოდში და რა დინამიკა განიცადა მართლმადიდებელი ეკლესიის დაფინანსების პოლიტიკამ ხელისუფლების ტრანზიციის პირობებში“, - აცხადებენ ორგანიზაციებში.

როგორც ორგანიზაციების მიერ გავრცელებულ განცხადებაშია ნათქვამი, წინა წლებში, სახელმწიფოს მიერ მართლმადიდებელი ეკლესიისა და სხვა რელიგიური ორგანიზაციების დაფინანსების საკითხის შეფასების დროს, კვლევა ორგანიზაცია „საერთაშორისო გამჭვირვალება - საქართველოს“ მიერ ამ საკითხებზე უკვე ჩატარებული რაოდენობრივი კვლევის შედეგებს დაეყრდნობა.

„მიგვაჩნია, რომ განსახილველი კვლევა წაახალისებს საჯარო დისკუსიებს იმ საკითხზე, თუ რამდენად ეფექტურად და გამჭვირვალედ იხარჯება მუნიციპალიტეტების საბიუჯეტო თანხები იმ პირობებში, როდესაც ადგილობრივ დონეზე ხშირად ძალიან მწვავედ დგას სოციალური და ეკოლოგიური პრობლემები“, - აცხადებენ ორგანიზაციებში.

[sknews.ge]