ადიგენში სტიქიის შედეგები შეისწავლეს და ახლა ზარალს ითვლიან

„სავარაუდოდ სამი დღე მაინც დაგვჭირდება იმისათვის, რომ დავადგინოთ რა ზარალი მიიღო სოფლებმა. წინასწარ ვერაფერს გეტყვით“, – გვეუბნება ადიგენის გამგებლის მოადგილე არსენ ბალახაშვილი.

ზარალის დათვლის პარალელურად, ადიგენის სტიქიაგამოვლილ სოფლებში ტექნიკა მუშაობს. კეთდება სანიაღვრე არხები, იმისთვის, რომ სტიქიის განმეორებისას მოსახლეობას ისევ პრობლემები არ შეექმნას. გარდა ამისა, გამგეობის ინფორმაციით, სტიქიისას დაზიანებულ ერთ ხიდს სოფელ ბენარაში და ორ ხიდს ვარხანში პირველადი რეაბილიტაცია ჩაუტარდა.

გამგებლის მოადგილის თქმით, სანიაღვრე არხების გაკეთებასა და ხიდების რეაბილიტაციისთვის გამგეობის სარეზერვო ფონდიდან 34. 000 ლარი გამოიყო. ზარალის დათვლის შემდეგ, სავარაუდოდ ამავე ფონდიდან დაეხამრება დაზარალებულებს გამგეობა.

„სარეზერვო ფონდში70 000 ლარი გვაქვს ასეთი შემთხვევებისთვის. რაც გვეყოფა, დავეხმარებით, რასაც არა, ცენტრალურ უწყებებს ვთხოვთ დახმარებას“, – ამბობს გამგებლის მოადგილე.

ვარხნის ორი და ბენარის ერთი ხიდის გარდა, სტიქიამ მთლიანად მოშალა სოფელ უნწის ხიდი, რომელიც სოფელს ცენტრალურ გზასთან და მიმდებარე სოფლებთან აკავშირებს. ამ დროისათვის აქ ტრანსპორტის გადაადგილება ისევ შეუძლებელია.

ადიგენის გამგეობაში ამბობენ, რომ სტიქიისას დაზიანებული ოთხივე ხიდი დაპროექტდება და ტენდერი გამოცხადდება: „ჩვენ ფინანსები არ გვაქვს, ხიდების შესაკეთებლად თანხებს, ინფრასტრუქტურის სამინისტრო გამოყოფს“.

ამ ეტაპზე ცნობილი არაა რა ფართობი გაანადგურა წყალდიდობამ, თუმცა, გამგეობაში ამბობენ, რომ ამ კუთხით მიღებულ ზარალს ვერ აანაზღაურებენ.

„ვისაც დაზღვეული აქვს მიწები, იმას სადაზღვეო კომპანია აუნაზღაურებს, ვისაც არა, ჩვენ ვერ დავეხმარებით“, – ამბობენ გამგეობაში.
შეგახსენებთ, 10 ივნისს, საღამოს, ძლიერი წვიმის შედეგად მოვარდნილმა ხევებმა და ნიაღვრებმა ადიგენის ოთხი სოფელი: ვარხანი, ბენარა, უნწა და სოფელი აბასთუმანი დააზარალა. დაიტბორა სასოფლო–სამეურნეო ნათესები, სახლები და ეზოები, დაიხოცა შინაური ცხოველი და ფრინველი.

[ლუბა გიორგაძე, ადიგენი]