ანა დოლიძე პრეზიდენტის საპარლამენტო მდივნად დაინიშნა

პრეზიდენტის განცხადებით, ამ პოზიციაზე ანა დოლიძის პირველი დავალება იქნება, პარლამენტის წევრები დაარწმუნოს, დაამტკიცონ პრეზიდენტის მიერ უზენაესი სასამართლოს მოსამართლეებად წარდგენილი კანდიდატურები.

გიორგი მარგველაშვილმა დღეს გამართულ პრესკონფერენციაზე პარლამენტს უზენაესი სასამართლოს წევრის თანამდებობაზე ნანა თოდუასა და თამარ ლალიაშვილის კანდიდატურები ხელახლა წარუდგინა. მისი განცხადებით, უზენაეს სასამართლოში სისხლის სამართლის კოლეგია ფაქტობრივად ვეღარ ფუნქციონირებს, რადგან მოსამართლეები არ ჰყავთ. პრეზიდენტმა პარლამენტს მოუწოდა, აღნიშნული გარემოება მხედველობაში მიიღოს და მის მიერ წარდგენილ კანდიდატურებზე სერიოზულად იმსჯელოს.

„ჩემი მზაობა, მხარი დავუჭირო ამ კანდიდატურებს, კიდევ უფრო განმტკიცებულია. მინდა იმედი გამოვთქვა, რომ მოსამართლეთა დამტკიცების გადაწყვეტილებას სწორედ მერვე მოწვევის პარლამენტი მიიღებს. პარლამენტი სექტემბერში აპირებს შეკრებას. თუ სექტემბრამდე საჭირო იქნება, მე მზად ვარ მხარი დავუჭირო საგანგებო სხდომის მოწვევას. დარწმუნებული ვარ, ამ ძალიან მნიშვნელოვან გადაწყვეტილებას პარლამენტი შესაბამისი ინტერესით მოეკიდება და იმედი მაქვს, ეს გადაწყვეტილება მიღებული იქნება“, - განაცხადა გიორგი მარგველაშვილმა.

პრეზიდენტმა უზენაესი სასამართლოს მოსამართლის თანამდებობაზე ანა დოლიძის, ნანა თოდუასა და თამარ ლალიაშვილის კანდიდატურები რამდენიმე თვის წინაც წარადგინა, თუმცა პარლამენტმა მათი კანდიდატურები ჩააგდო.

[sknews.ge]