პარლამენტმა თვითმმართველობისა და საარჩევნო კოდექსებზე პრეზიდენტის ვეტო დაძლია

საკანონმდებლო ორგანოს წევრებს მოტივირებული შენიშვნები პრეზიდენტის საპარლამენტო მდივანმა, ანა დოლიძემ გააცნო. პარლამენტის სხდომის მიმდინარეობისას დოლიძე და ირაკლი კობახიძე ერთმანეთს რამდენჯერმე დაუპირისპირდნენ.

როგორც ცნობილია, გიორგი მარგველაშვილმა თვითმმართველობისა და საარჩევნო კოდექსებში შესატან ცვლილებებს ვეტო 20 ივლისს დაადო.
პრეზიდენტის აზრით, როდესაც 7 ქალაქს ერთმევა თვითმმართველი ქალაქის სტატუსი, ეს აკნინებს თვითმმართველობის გაღრმავებასა და გაძლიერებას ქვეყანაში.

საქართველოს პარლამენტმა თვითმმართველობისა და საარჩევნო კოდექსებზე პრეზიდენტის მოტივირებული შენიშვნები არ გაიზიარა. პარლამენტის წევრებმა გიორგი მარგველაშვილის ვეტო 94 ხმით, 5-ის წინააღმდეგ დაძლიეს და ამით პროექტის პირვანდელ ვარიანტს დაუჭირეს მხარი.

პარლამენტის მიერ მიღებული კანონპროექტის თანახმად, შვიდ თვითმმართველ ქალაქს: - თელავს, ოზურგეთს, ზუგდიდს, გორს, ამბროლაურს, მცხეთასა და ახალციხეს თვითმმართველი ქალაქის სტატუსი ჩამოერთმევა და ისინი შესაბამის მუნიციპალიტეტებს მიუერთდება. შედეგად, ქვეყანაში, ნაცვლად 12 თვითმმართველი ქალაქისა, 5 თვითმმართველი ქალაქი დარჩება.

რაც შეეხება საარჩევნო კოდექსს, პრეზიდენტმა ვეტო ცესკოს დაკომპლექტების წესის გამო დაადო. მისი თქმით, ეს გადაწყვეტილება თვითმმართველობის არჩევნების ხარისხს აკნინებს და ამცირებს პლურალიზმს და ნდობას საარჩევნო ადმინისტრაციის მიმართ.

[sknews.ge]