სამი ოქრო და გუნდური მეორე ადგილი ძალისმიერ წოლჭიმში

შოთა ბეჟაშვილის სახელობის ტურნირი წოლჭიმში დღეს, 19 ივნისს, ქალაქ სიღნაღში გაიმართა. რესპუბლიკურ ტურნირზე ახალციხის სახელით შინაგან საქმეთა სამინისტროს სამცხე–ჯავახეთის პოლიციის დეპარტამენტის დირექტორი თეიმურაზ კალანდაძე, საპატრულო პოლიციის სამცხე–ჯავახეთის მთავარი სამმართველოს ყოფილიუფროსი დავით მაღრაძე და ამჟამინდელი უფროსის მოადგილე კობა კობახიძე მონაწილეობდნენ.
სამივე მათგანმა შესაბამის წონით კატეგორიაში, პირველი ადგილი და ოქროს მედალი აიღო.

სამცხე–ჯავახეთის პოლიციის დეპარტამენტის დირექტორმა თეიმურაზ კალანდაძემ, 73 კილოგრამ წონით კატეგორიაში, პირველი ადგილი აიღო და ოქროს მედლით დაჯილდოვდა.

„საკუთესო შედეგით გახდა ჩემპიონი. ძალიან დიდი ბრძოლა მოუწია, მეორე ადგილოსანს 2– კილოგრამ ნახევრით გაუსწრო. ამ წონით კატეგორიაში 11 ადამიანი მონაწილეობდა“,– ამბობს სამცხე–ჯავახეთის ათლეტიზმის ფედერაციის პრეზიდენტი სპარტაკ თაქთაქიძე.



იგივე კატეგორიაში, ოღონდ ვეტერანების დივიზიონში, ასევე პირველი ადგილი და ოქროს მედალი მოიპოვა სამცხე–ჯავახეთის მთავარი სამმართველოს უფროსის მოადგილემ კობა კობახიძემ.

„წელს მან გააუმჯობესა რეკორდი. 5 ვეტერანი ჰყავდა კონკურენტი, ოქროს მედალი მიიღო და გახდა საქართველოს რეკორდსმენი“,– ამბობს სპარტაკ თაქთაქიძე.



შოთა ბეჟაშვილის სახელობის ტურნირში ასევე ახალციხის სახელით მონაწილეობდა სამცხე–ჯავახეთის საპატრულო პოლიციის ყოფილი უფროსი დავით მაღრაძე. მან პირველი ადგილი და ოქროს მედალი, 105 კილოგრამ კატეგორიაში მიიღო.



შსს–ს მაღალჩინოსნებთან ერთად, ტურნირში, ახალციხიდან, მოზარდების გუნდიც მონაწილეობდა. მათ პიროვნულად საპრიზო ადგილები არ აუღიათ, თუმცა, საბოლოო ჯამში, სამცხე–ჯავახეთის სპორტული სკოლის „ჯიმ–ოლიმპის“ სპორტსმენებმა, საქართველოს მასშტაბით, გუნდური მეორე ადგილი დაიკავეს.






[ვარლამ წიკლაური, ახალციხე]