ახალციხელმა სპორტსმენებმა ძალისმიერ სამჭიდში გუნდური მესამე ადგილი დაიკავეს

საქართველოს 2017 წლის ჩემპიონატში ძალისმიერ სამჭიდსა და წოლჭიმში ახალციხის სასპორტო სკოლიდან 11 სპორტსმენი იღებდა მონაწილეობას. აქედან 6 პირველ ადგილზე გავიდა, 1– მეორეზე, ხოლო 2 – მესამე ადგილზე.

„ახალციხელი სპორტსმენები პირველ ნაბიჯებს დგამენ საქართველოს ნაკრებ გუნდში დასამკვიდრებლად, ევროპისა და მსოფლიო ჩემპიონატზე საასპარეზოდ. საქართველოს ნაკრებში ჩარიცხვა ახალციხის გუნდიდან ჩემი დიდი სურვილია. მოკლე ვადაში ჩვენ უკვე კარგი გუნდური შედეგები გვაქვს. საქართველოს ჩემპიონატებზე ოთხი თასი გვაქვს აღებული“, – განაცხადა გუნდის მწვრთნელმა, ასევე სამცხე–ჯავახეთის ათლეტიზმის ფედერაციის ხელმძღვანელმა სპარტაკ თაქთაქიძემ.

საქართველოს ჩემპიონატში რეგიონის სახელით იასპარეზა და პირველი ადგილი მოიპოვა სამცხე–ჯავახეთის საპატრულო პოლიციის დეპარტამენტის ყოფილმა უფროსმა დავით მაღრაძემ. საპატრულო პოლიციის სამცხე-ჯავახეთის მთავარი სამმართველოს უფროსის მოადგილემ კობა კობახიძემ კი მეორე ადგილი და ვერცხლის მედალი მოიპოვა.

შეგახსენებთ, რომ მიმდინარე წლის 29 მარტს ძალისმიერ წოლჭიმში საქართველოს ღია ჩემპიონატზე, სამცხე-ჯავახეთის პოლიციის დეპარტამენტის დირექტორმა თეიმურაზ კალანდაძემ და საპატრულო პოლიციის სამცხე-ჯავახეთის მთავარი სამმართველოს უფროსის მოადგილემ კობა კობახიძემ ერთი ოქროს და ერთი ვერცხლის მედალი აიღეს.

[sknews.ge]