სამცხე–ჯავახეთის პოლიციის პირველმა პირებმა ოქროს მედლები აიღეს

დღეს, 20 დეკემბერს თელავში, ძალისმიერ სამჭიდსა და წოლჭიმში გიორგი რეხვიაშვილის სახელობის საქართველოს თასის მეექვსე გათამაშება გაიმართა. ქვეყნის მასშტაბით გამართულ ჩემპიონატს წელს პირველად ახალციხეც შეუერთდა.

სამცხე–ჯავახეთის პოლიციის დეპარტამენტის დირექტორმა თეიმურაზ კალანდაძემ წოლჭიმში ღია ასაკობრივ დივიზიონში პირველი ადგილი აიღო. იგივე კატეგორიაში, ოღონდ ვეტერანების დივიზიონში, ასევე პირველი ადგილი სამცხე–ჯავახეთის მთავარი სამმართველოს უფროსის მოადგილემ კობა კობახიძემ დაიკავა.

„თეიმურაზ კალანდაძემ 150 კგ. კობახიძემ კი 130 კგ–ს აწევა შეძლო. წელს ახალციხის დებიუტი შედგა. სასიამოვნოა, რომ პოლიციელები აქტიურობენ. რთული სამუშაო აქვთ და ამის გამო ეს კიდევ უფრო დასაფასებელია“, – ამბობს საქართველოს „ფაუერ ლიფთინგის“ ფედერაციის გენერალური მდივანი სოსო მიქელაძე.

პირველი ადგილის მფლობელებს ოქროს მედლები გადაეცათ. თუმცა, კალანდაძემ დღეს მეორე ოქროს მედალიც მიიღო.

„მან ასევე წოლჭიმში, აწევათა გამეორებაში პირველი ადგილი დაიკავა. საკუთარი წონის შტანგა 40–ჯერ აწია“, – გვიხსნის მიქელაძე.



[თამუნა უჩიძე, ახალციხე]