5 ოქრო და I ადგილი – შსს–ს გუნდის წამატება ძალისმიერი სამჭიდში

ძალისმიერი სამჭიდის საქართველოს ჩემპიონატი - „საქართველოს თასი - 2017“ თბილისში 4 ივნისს გაიმართა, რომელშიც 14 გუნდი მონაწილეობდა.

სამცხე–ჯავახეთის ათლეტიზმის ფედერაციის ხელმძღვანელის სპარტაკ თაქთაქიძის განმარტებით სამცხე–ჯავახეთიდან ჩემპიონატში 8 სპორტსმენი მონაწილეობდა, აქედან სამმა მეორე ადგილი აიღო, ხოლო ხუთმა სპორტსმენმა პირველი ადგილი მოიპოვა.

ოქროს მედალი მოიპოვა შინაგან საქმეთა სამინისტროს სამცხე-ჯავახეთის პოლიციის დეპარტამენტის დირექტორმა, თეიმურაზ კალანდაძემ 74 კგ წონით კატეგორიაში , მან 150 კილოგრამიანი შტანგა ასწია. საპატრულო პოლიციის დეპარტამენტის თანამშრომელმა, ლევან გილიგაშვილმა კი 83 კგ წონით კატეგორიაში 185 კილოგრამიანი შტანგა დასძლია და ასევე ოქროს მედალი მოიპოვა. ვეტერანთა დივიზიონში, საპატრულო პოლიციის დეპარტამენტის სამცხე-ჯავახეთის მთავარი სამმართველოს უფროსის მოადგილემ, კობა კობახიძემ 105 კგ წონით კატეგორიაში 142,5 კილოგრამიანი შტანგა ასწია, ხოლო საპატრულო პოლიციის დეპარტამენტის იმერეთის მთავარი სამმართველოს აეროპორტის განყოფილების უფროსმა დავით მაღრაძემ 120 კგ-მდე წონით კატეგორიაში 120 კილოგრამი დასძლია. განსაკუთრებულ დავალებათა დეპარტამენტის თანამშრომელმა თეიმურაზ გოგოლაძემ კი 93 კგ კატეგორიაში 180 კილოგრამიანი შტანგა ასწია. სამივე სპორტსმენი ოქროს მედლის მფლობელი გახდა.

შსს-ს სპორტული კლუბების წევრები მსოფლიო ჩემპიონატების და საერთაშორისო ტურნირების მრავალგზის პრიზიორები არიან.
სპარტაკ თაქთაქიძის განმარტებით, ეს იყო მაღალი დონის ჩემპიონატი. ამ ჩემპიონატზე მაღალი შედეგების მქონე სპორტსმენებს საშუალება ექნებათ მონაწილეობა მიიღონ ევროპისა და მსოფლიო ჩემპიონატებზე.

„ევროპა–მსოფლიო ჩემპიონატების სალიცენზიო ტური იყო. ის სპორტსმენები, რომლებიც მაღალ შედეგებს დააფიქსირებენ, დააკმაყოფილებენ საერთაშორისო შედეგებთან მიღწეულ დონეს, ეს სპორტსმენები მიიღებენ მონაწილეობას ევროპა–მსოფლიო ჩემპინატებზე. ვის ექნება მონაწილეობის უფლება დაახლოებით ორ თვეში გაირკვევა“, – განაცხადა სპარტაკ თაქთაქიძემ.

[თინათინ ზაზაძე, ახალციხე]