საჯარო სკოლებში სამეურვეო საბჭოებს ირჩევენ

სამეურვეო საბჭოს არჩევნებისთვის საარჩევნო უბანი საჯარო სკოლებში დილის 09:00 საათზე გაიხსნა. ხმის მიცემა კი პედაგოგებს და მშობლებს 10:00 საათიდან 16:00 საათამდე შეეძლოთ.

სკოლაში, სადაც სწავლობს 500 მოსწავლეზე მეტი, სამეურვეო საბჭოში ირჩევენ12 წევრს, ხოლო სკოლაში, რომელშიც სწავლობს 500 მოსწავლეზე ნაკლები – 6 წევრს.

იმ სკოლებში, სადაც სწავლობს 500-ზე ნაკლები მოსწავლე და სწავლება ხორციელდება მხოლოდ 2 საფეხურზე, მშობელთა საფეხურების მიხედვით თანაბარი წარმომადგენლობის უზრუნველსაყოფად აირჩევა 8 სამეურვეო საბჭოს წევრი.

სამეურვეო საბჭოში მშობელსა და პედაგოგს თანაბარი რაოდენობით სამი წლის ვადით ირჩევენ.

სკოლის სამეურვეო საბჭო ირჩევს სკოლის დირექტორს, სკოლის დირექტორის წარდგინებით ამტკიცებს სკოლის შინაგანაწესს, ბიუჯეტს, ირჩევს დისციპლინურ კომიტეტს. სამეურვეო საბჭო სკოლის მმართველობაში ერთ-ერთი მნიშვნელოვანი რგოლია.

სამეურვეო საბჭოს არჩევნებს განათლებისა და მეცნიერების სამინისტროს წარმომადგენლები საქართველოს ყველა რეგიონში აკვირდებიან.

არჩევნებზე დამკვირვებლის სტატუსით დასწრება სამოქალაქო საზოგადოების და არასამთავრობო ორგანიზაციების წარმომადგენლებსაც შეეძლოთ.

[თინათინ ზაზაძე, ახალციხე]