მეორე საჯარო სკოლაში დირექტორის კანდიდატურას მხარი არ დაუჭირეს

ახალციხის მეორე საჯარო სკოლაში დირექტორის არჩევნები 14:00 საათზე დაიწყო. ბელა დიასამიძეს, რომელიც დირექტორობის ერთადერთი კანდიდატი იყო, სამეურვეო საბჭოს წევრთა უმრავლესობამ მხარი არ დაუჭირა.

არჩევნებში სამეურვეო საბჭოს 7 წევრი და ქალაქის მერიის წარმომადგენელი ზურა სამსონიძე მონაწილეობდნენ. დიასამიძეს 8 წევრიდან მხარი მხოლოდ სამმა დაუჭირა.

საარჩევნო პროცესს ბელა დიასამიძის წარმომადგენელი ნაირა სამსონიძე ესწრებოდა, რომელიც ამბობს, რომ სამეურვეო საბჭოს წევრები სკოლის დირექციის ზეგავლენის ქვეშ იყვნენ და შედეგიც შესაბამისია.

„სამეურვეო საბჭოს წევრებზე ყოფილი ხელმძღვანელობის ზეგავლენა აშკარად შეინიშნებოდა. იმდენად დაბნეულები იყვნენ, რომ ხმის დამთვლელიც არ აირჩიეს. ამ ფონზე სამი დადებითი და 5 უარყოფითი ხმა იყო და ესეც გაუკვირდათ, ამდენ ხმასაც არ ელოდნენ“, – ამბობს ნაირა სამსონიძე.

რაიმე სახის ზეწოლას კატეგორიულად უარყოფენ სამეურვეო საბჭოს წევრები და სკოლის დირექტორის მოვალეობის შემსრულებელი მარინა ზედგინიძე.

„ზრდასრული ადამიანები იჯდნენ სამეურვეო საბჭოში, ბავშვები არ არიან, რომ მათზე ზეწოლა მომეხდინა. თუ ვინმეს აქვს ეჭვი და პრეტენზია, არსებობს სასამართლო, შეიტანოს საჩივარი და შემდეგ გავცემ პასუხს“, – ამბობს მარინა ზედგინიძე.

„არანაირი ზეგავლენა არ ყოფილა და არც ზეწოლა. შეგიძლიათ თითოეულ წევრს გაესაუბროთ“,– ამბობს მეორე საჯარო სკოლის სამეურვეო საბჭოს მდივანი ირა საქიძე.

იყო თუ არა ზეწოლა, აღნიშნული კითხვის დასმამ მეორე საჯარო სკოლის სამასწავლებლოში პედაგოგების პროტესტი და აღშფოთება გამოიწვია.

[თინათინ ზაზაძე, ახალციხე]