ახალციხეში არჩევნების შედეგებს აჯამებენ

ახალციხის ხუთ სკოლაში არჩევნების შედეგები უკვე შეაჯამეს.

როგორც ”სამხრეთის კარიბჭეს” პირველ, მე-2, მე-3, მე-5 და მე-6 სკოლებში განუცხადეს ხმის მიცემისა და დათვლის პროცედურები დარღვევების გარეშე დასრულდა. შესაბამისად, აღნიშნულ სკოლებში სამეურვეო საბჭოს წევრების ვინაობაც ცნობილია.

პირველ სკოლაში 982 მშობელიდან 134 გამოცხადდა, 72 მასწავლებლიდან კი 42;

მე-6 სკოლაში სულ რეგისტრირებული 130 ამომრჩევლიდან 109 მშობელმა და 21-მა პედაგოგმა მისცა ხმა.

მე-2 სკოლაში არჩევნებზე მხოლოდ 2 პედაგოგი არ მივიდა. აქ 48 მასწავლებლიდან საკუთარი არჩევანი 46-მა დააფიქსირა. 347 მშობელიდან 116 გამოცხადდა.

მე-3 სკოლაში დღეს არჩევნებზე 62 პედაგოგიდან 56 მივიდა. რაც შეეხება მშობლებს ხმა დაახლოებით 217-მა მშობელმა მისცა.

მე-5 სკოლაში 1 134 მშობელიდან 290 გამოცხადდა. 90 პედაგოგიდან კი 64-მა დააფიქსირა საკუთარი პოზიცია.

ამავე სკოლის პედაგოგი და საარჩევნო კომისიის თავმჯდომარე მაია თათეშვილი ამომრჩეველთა სიმცირეს არჩევნებისათვის მოსამზადებელი პერიოდის სიმცირით ხსნის: ”გვიან გავიგეთ არჩევნების შესახებ და მოსამზადებლად სულ 2 კვირა გვქონდა”.

დღეს სამეურვეო საბჭოს არჩევნები ახალციხის მუნიციპალიტეტში მხოლოდ კერძო სკოლაში (”მზექა”) არ ჩატარებულა.

- ”კერძო სკოლებში სამეურვეო საბჭო არ არსებობს. საერთოდ სამეურვეო საბჭო უფრო ორიენტირებულია დირექტორის არჩევაზე, კერძო სკოლებში კი დირექტორების არჩევა სამეურვეო საბჭოს საშუალებით არ ხდება”, - ამობს ”მზექას” დირექტორი ბელა კაპანაძე.

ახალციხის საგანმანათლებლო რესურსცენტრის უფროსის მოვალეობის შემსრულებლის დიანა ინასარიძის განცხადებით, მუნიციპალიტეტის მასშტაბით არჩევნებმა დარღვევების გარეშე ჩაიარა.



[თამუნა უჩიძე, ნუკა სტეფნაძე - ახალციხე]