ახალციხეში სამეურვეო საბჭოს არჩევნებზე აქტივობა დაბალია

პირველ საჯარო სკოლაში 12:00 საათისთვის 982 მშობლიდან 103 გამოცხადდა, 72 მასწავლებლიდან კი 16.

- ”ვერ ვიტყვით, რომ ამომრჩეველი აქტიურია. ვფიქრობ, შუადღის მერე აქტივობა კიდევ უფრო შემცირდება”, - ამბობს ამავე სკოლის საარჩევნო კომისიის თავმჯდომარე ციცინო თათენაშვილი.

ნაკლებად აქტიურობს ამომრჩეველი მე-6 საჯარო სკოლაშიც. აქ 197 მშობლიდან ჯერ საკუთარი არჩევანი მხოლოდ 43-მა დააფიქსირა. 24 მასწავლებლიდან ხმის მისაცემად 9 მივიდა.

მე-5 საჯარო სკოლის საარჩევნო კომისიის თავმჯდომარის მაია თათეშვილის თქმით, ამ დროისთვის აქტივობა მათ სკოლაშიც არც თუ ისე მაღალია: ”89 მშობელი და 20 მასწავლებელი მოვიდა”.

აღნიშნულ სკოლაში სულ 1 134 ამომრჩეველია.

მე-3 საჯარო სკოლაში 12 საათისთვის არჩევნებზე 80 მშობელი და 27 მასწავლებელი გამოცხადდა.

მე-2 საჯარო სკოლაში, 3000-მდე მშობლიდან ხმა 48-მ მისცა. ამავე სკოლაში საკუთარი არჩევანი 25-მა მასწვლებელმა დააფიქსირა.

- ”ყველა მშობელი გაფრთხილებული გვყავს და მაღალ აქტივობას ველოდებით, ვფიქრობთ, ბევრი მოვა”, - გვითხრა მე-2 საჯარო სკოლის დირექტორმა მარინა ზედგინიძემ.

მიუხედავად ქალაქის სკოლებში ამომრჩეველთა ნაკლები აქტიურობისა
ახალციხის საგანმანათლებლო რესურსცენტრში აცხადებენ, რომ ამომრჩეველი ქალაქის სკოლებში უფრო აქტიურია, ვიდრე სოფლის სკოლებში.

- ”ალბათ სოფლებში აქტივობა შუადღის შემდეგ გაიზრდება”, - ამბობს ახალციხის საგანმანათლებლო რესურსცენტრის უფროსის მოვალეობის შემსრულებელი დიანა ინასარიძე.

საარჩევნო უბნები 10:00 საათზე გაიხსნა და 16:00 საათზე დაიხურება.



[თამუნა უჩიძე, ნუკა სტეფნაძე - ახალციხე]