პირველი ენერგოეფექტური ბაღი ახალციხეში შენდება

ენერგოეფექტური, იგივე "მწვანე ბაღი“, იაძის ქუჩაზე, N12–ში განთავსდება. პროექტის მიხედვით, უკვე არსებული მეოთხე ბაგა-ბაღი დაინგრევა და მის ნაცვლად რამდენიმე სართულიანი, თანამედროვე სტანდარტებით აღჭურვილი შენობა აშენდება.

ენერგოეფექტური ბაღის პროექტის შესადგენად, ახალციხის მერიის მიერ გამოცხადებულ ტენდერში შპს ,,Dagenbach Landscapes“–მა გაიმარჯვა. გერმანულმა კომპანიამ სამუშაოების გეგმა დღეს, 7 ივნისს, ადგილობრივ თვითმმართველობას გააცნო.

პროექტის ავტორების თქმით, მწვანე საბავშვო ბაღში, ჩვეულებრივი შენობებისგან განსხვავებით, ენერგოეფექტურობის კუთხით აქ არაერთი ღონისძიება გატარდება. სამუშაოებისას გათვალისწინებული იქნება გარემოს დაცვა, ხარჯთეფექტურობა, ენერგიის დაზოგვა და უსაფრთხოება.

"ასეთი კომპლექსური ღონისძიება, მშენებლობა ნულიდან რომ დაგვეწყო და მწვანე რეიტინგით რეგისტრირებული ბაღი აგვეშენებინა არ გვქონია. ეს იქნება პირველად საქართველოში და ვულოცავ ამას ახალციხეს. ყველაზე მნიშვნელოვანი ის არის, რომ შენობა სრულად დათბუნებული იქნება, ამიტომ ენერგიის დანაკარგი მინიმუმადეა დაყვანილი“, – განმარტავს პროექტის ხელმძღვანელი ზაალ ხელაძე.

ენერგოეფექტური ბაღის პროექტის ღირებულება 40 000 ლარია. მისი შესყიდვა ადგილობრივი ბიუჯეტით ხორციელდება.
მშენებლობის დასრულების შემდეგ, თანამედროვე სტანდარტებით აღჭურვილი ბაღი 400 აღსაზრდელს მოემსახურება.

"არქიტექტურული და საინჟინრო თვალსაზრისით, ასევე, ენერგო ეფექტურობასთან დაკავშირებით ყველა დეტალი კარგადაა გათვლილი. ეს პროექტი ეხება, როგორც ელექტროენერგიის, ასევე ბუნებრივი აირის ეკონომიას, წყლის დაზოგვას და ა.შ. მშენებლობა საკმაოდ ძვირადღირებულია, ჩვენ მოგვიწევს გარკვეული მუშაობა, რომ მოვიძიოთ თანხები, როგორც ჩვენი ბიუჯეტის შიგნით, ასევე ჩვენს დონორ ორგანიზაციებთან", – განმარტავს ქალაქ ახალციხის მერის მოადგილე ზაზა თამარაშვილი.

ენერგოეფექტური საბავშო ბაღის მშენებლობის პროექტი მერიას რამდენიმე დღეში ჩაბარდება. პროექტის მიხედვით, ბაღის მშენებლობა 1 წელიწადში უნდა დასრულდეს.



[თაკო ფეიქრიშვილი, ახალციხე]