პირველი ენერგოეფექტური ბაღი ახალციხეში

სოფელ მინაძეში ახალი საბავშვო ბაღი საზეიმოდ, გუშინ, 1 მარტს გაიხსნა. ბაღის გახსნას რეგიონისა და მუნიციპალიტეტის ხელმძღვანელები დაესწრნენ.

მინაძეში საბავშვო ბაღის რეაბილიტაცია გასულ, 2015 წელს დაიწყო. ბაგა–ბაღის რეაბილიტაციასა და ინვენტარით აღჭურვას, ადგილობირივი ბიუჯეტიდან 110.000 ლარი მოხმარდა.

ახალციხის სხვა ბაღებისაგან განსხვავებით, მინაძის ბაღში გათბობისთვის მზის ენერგიას გამოიყენებენ. საზოგადოებრივი განვითარების ცენტრმა ბაღში მზის კოლექტორი და ენერგოეფექტური ღუმელი დაამონტაჟა.

მინაძის საბავშვო ბაღი 50 აღსაზრდელზეა გათვლილი, აქ ორი ჯგუფი იმუშავებს. დასაქმებული კი 12 ადამიანია, როგორც ახალციხის მუნიციპალიტეტის სკოლამდელი აღზრდის დაწესებულებათა გაერთიანებაში აცხადებენ, 12–ვე თანამშრომელი მინაძის მცხოვრებია.

ახალგახსნილ ბაღს მინაძის სკოლის დირექტორმა საკანცელარიო ნივთები, სახალხო მთქმელმა ვასილ კვინცხაძემ კი თავისი ლექსების კრებული „დამილოცე საქართველო“ უსახსოვრა.

ახალციხის თემის სკოლამდელი აღზრდის დაწესებულებათა გაერთიანების დირექტორის ,ლელა ზაზაძის თქმით, მომავალში ბაგა–ბაღების გახსნა იგეგმება სოფლებში: წნისში, ფერსასა და წყალთბილაშიც.

სოფელ მინაძეში საბავშვო ბაღი 1996 წელს დაიხურა და მას შემდეგ აღარ ფუნქციონირებდა. ახალი ბაღი ორ სოფელს, მინაძესა და ჭაჭარაქვს მოემსახურება.











[სოფო ღვინიაშვილი, ახალციხე]