2019 წელს ახალციხეში ორი საბავშვო ბაღი აშენდება

ერთი ბაღი, რომლიც 200 აღსაზრდელზე იქნება გათვლილი, რუსთაველის ქუჩაზე, ე.წ. სამხედრო დასახლების ტერიტორიაზე აშენდება.

„ეს ძალიან მნიშვნელოვანია, რადგან მიმდებარე ტერიტორიაზე ბაღი არ არის. პროექტის დიზაინზე მიდის შეთანხმება. უახლოეს პერიოდში გვეცოდინება რამდენი ლარი იქნება ორივე ბაღის ასაშენებლად საჭირო“, – ამბობს ზაზა მელიქიძე.

მეორე საბავშვო ბაღი ქალაქის ცენტრში აშენდება, თუმცა კონკრეტულად რომელ ადგილზე, ეს ჯერ გადაწყვეტილი არ არის. აღნიშნული ბაღი 100 ბავშვზე იქნება გათვლილი.

„ეს საკითხიც განხილვის სტადიაშია, დონორებთან შეთანხმებას ვაწარმოებთ. ფაქტიურად, ტერიტორია რაც გვაქვს ქალაქში, მეტი ბავშვის დატევის საშუალებას არ იძლევა. ახალი სტანდარტებით ერთ აღსაზრდელზე მინიმუმ 35–40 კვ. მეტრია საჭირო, აქ იგულისხმება შენობაც და ეზოც“, – ამბობს მელიქიძე.

შეგახსენებთ, რომ ახალციხეში პირველი ენერგოეფექტური ბაღის მშენებლობა ჯერ კიდევ 2016 წელს იგეგმებოდა, თუმცა ახალციხის მერიას 4 500 000 ლარიანი პროექტის დაფინანსებაზე რეგიონებში განსახორციელებელი პროექტების ფონდიდან უარი უთხრეს.

ახალციხის მერი ზაზა მელიქიძე ამბობს, რომ ამ საკითხზე დონორებთან მოლაპარაკებები კიდევ მიმდინარეობს, წელს დაგეგმილი ბაღების მშენებლობა კი სხვა პროექტია.

[თინათინ ზაზაძე, ახალციხე]