‘გზას თუ არ გვიკეთებენ, ‘ვალინკები’ მაინც მოგვცენ’ – პროტესტი დანიელაშვილის ქუჩაზე

წლებია ადგილობრივები ხელისუფლებისგან ქუჩის მოასფალტებას ითხოვენ, თუმცა უშედეგოდ.

„აგერ რამდენიმე დღის წინ იყვნენ მოსული და რავიცი. ვუთხარი ვალინკები მაინც მოგვიტანეთ, გზას თუ არ გვიკეთებთ–მეთქი“, – გვეუბნება დანიელაშვილის ქუჩის ერთ–ერთი მცხოვრები.

აქ გზის შეკეთებას თაობები ალბათ ბოლო 35 წელიწადია ელოდებიან. ამბობენ, რომ მოუწესრიუგებელი გზისა და სანიაღვრე არხის არ არსებობის გამო ყოველი გაწვიმებისას წყალი სადარბაზოსა და სარდაფში შესდით.

„40 წელია აქ ვცხოვრობ და 40 წელია ამ დღეში ვართ. მთელი ქალაქი რომ მოიაროთ, ასეთ ტალახს ვერსად ნახავთ“, – ამბობს დანიელაშვილის ქუჩაზე მცხოვრები ანჟიკ აკოფიანი.

მოსახლეობა ქალაქის მერიისგან ყურადღებას ითხოვს. ამბობენ, რომ თვითმმართველობის არჩევნებამდე მერია პრობლემების მოგვარებას დაჰპირდათ. მათივე თქმით, 120–მა მოსახლემ მერს ხმა ამ დაპირების იმედად მისცა.

„ახლა არჩევნებზე საერთოდ არ მივიდივართ. მიზეზი?! მიზეზი ის არის, რომ ამ პრობლემას არ გვიგვარებენ“, – ამბობენ დანიელაშვილის ქუჩის განაწყენებული მცხოვრებლები.

ახალციხის მერიის საზოგადობასთან ურთიერთობის სამსახურში განმარტავენ, რომ ქალაქის მერიას საპროექტო წინადადება მზად აქვს: „გამოცხადდება ტენდერი და დანიელაშვილის ქუჩაზე ასფალტო–ბეტონის გზა დაიგება“.

თუმცა, როგორც მერიაში ამბობენ, როდის გამოაცხადებენ ტენდერს, ჯერ უცნობია.











[ვარლამ წიკლაური, ახალციხე]