შეცდომა საპატიო სტუმრებისთვის განკუთვნილ სუვენირებზე

მინის სუვენირები „ქართულ–ებრაულ ურთიერთობებში შეტანილი წვლილისთვის“ უძველესი სინაგოგის იუბილეზე მოწვეულ სტუმრებს გადაეცათ. მასზე 29.05 2016–ის ნაცვლად მითითებულია 29.05. 2015. გასული წლის თარიღით მინის სუვენირი 20 პიროვნებას გადაეცა.

ღონისძიება ახალციხის მერიის ორგანიზებით მოეწყო. ტექნიკური მხარის მომზადებისათვის ადგილობრივმა თვითმმართველობამ ტენდერი გამოაცხადა, რომელში გამარჯვებულიც შპს ,,creative group” გახდა. მან მოსამზადებელი სამუშაოები 29 995 ლარის ფარგლებში შეასრულა.
ორგანიზაციაში ,,სამხრეთის კარიბჭეს“ დაუდასტურეს, რომ მსგავსი სუვენირების დამზადება მათ კომპეტენციაში შედიოდა, თუმცა ტექსტი შემკვეთმა, ანუ ახალციხის მერიამ გადაუგზავნათ.

„ სუვენირების წარწერები, ტექსტები შემსყიდველმა დაამუშვა და გადმოგვიგზავნა. როცა ენდობი და გჯერა, რომ ეს ასე იქნება, არ ამოწმებ. შემდეგ ეს დამამზადებელ კომპანიას გადავუგზავნეთ და იმათმაც ავტომატურად გადაიტანეს. ეს აღმოფხვრადია და თუ პრობლემაა გამოვასწორებთ“, – ამბობს შპს ,,creative group”–ის დირექტორი მაკა ჭოველიძე.

სუვენირების არასწორ თარიღთან დაკავშვირებით, ქალაქ ახალციხის მერიის საზოგადოებასთან ურთიერთობის სამსახურში აცხადებენ, რომ შეცდომა უმნიშვნელოა: ,,მხოლოდ ერთ ასეთ სუვენირზე გაიპარა პატარა ხარვეზი, მსგავსი რამ შეიძლება ყველას მოუვიდეს“.
შეცდომა, რომ მხოლოდ ერთ სუვენირზე არ გაპარულა, ამის შესახებ ,,სამხრეთის კარიბჭეს“ ღონისძიებაზე მყოფნა სტუმრებმა და თავად იმ პირებმაც დაუდასტურეს, რომლებმაც მინის სუვენირები საჩუქრად მიიღეს.

„გია კოპაძის მიერ, ახალციხის მუნიციპალიტეტის სახელით, საზეიმო ვითარებაში, ქართულ–ებრაულ ურთიერთობებში შეტანილი წვლილისათვის გადმომეცა სიმბოლური სუვენირი. ფაქტი ჯიუტია და შეცდომა მართლაც დაფიქსირდა სუვენირების ტექსტზე“, – ამბობს ერთ–ერთი სტუმარი.





[თაკო ფეიქრიშვილი, ახალციხე]