ქართულ-სომხური საგანმანათლებლო ბანაკი დასრულდა

აღნიშნული ბანაკი 22 მაისიდან დაიწყო და სომეხი და ქართველი ახალგაზრდებისთვის სამცხე-ჯავახეთის ტურისტული პოტენციალის გაცნობას ეხებოდა. ახალგაზრდებმა თეორიულ სწავლებასთან ერთად დაათვალიერეს რეგიონის ისტორიულ-კულტურული ღირშესანიშნაობები, ეწვივნენ ბორჯომ-ხარაგაულის ტყე-პარკსა და ჯავახეთის დაცულ ტერიტორიებს, გაეცნენ მხარის ეთნიკურ და რელიგიურ მრავალფეროვნებას. ბანაკის ფარგლებში 26 მაისს აღინიშნა საქართველოს, ხოლო 28 მაისს სომხეთის დამოუკიდებლობის დღეები.

პროექტის ქართველი მონაწილეები სამომავლოდ, პროექტით გათვალისწინებული მეორე ბანაკის ფარგლებში, სომხეთს, კერძოდ კი შირაქის მარზას ესტუმრებიან, სადაც საზღვრის მეორე მხარეს მდებარე რეგიონის ტურისტულ პოტენციალსაც გაეცნობიან. პროექტის მიზანს წარმოადგენს საქართველოსა და სომხეთის საზღვრისპირა რეგიონებში, კერძოდ კი სამცხე-ჯავახეთსა და შირაქში მცხოვრები ახალგაზრდების მონაწილეობით ტურისტული გზამკვლევის შემუშავება ამ ორ რეგიონზე.

პროექტის მონაწლეთა განცხადებით, „ახალგაზრდა მოგზაურების“ უპირველესი მიზანი, კერძოდ ორი რეგიონის ახალგაზრდებს შორის ძლიერი მეგობრობის ჩამოყალიბება, მიღწეულია.

პროექტი ხორციელდება ადგილობრივი არასამთავრობო ორგანიზაციის „სამოქალაქო ინიციატივების ასოციაციის“ მიერ, რომლის პარტნიორსაც სომხეთში წარმოადგენს „სათემო განვითარების ცენტრი“. პროექტი სრულდება 2016 წლის აგვისტოში.

[sknews.ge]