ახალციხეში 1 ივნისი აღნიშნეს

არასამთავრობო ორგანზიაციების ინიციტივით მოწყობილი გასართობი აქტივობები 13:00 საათზე დაიწყო.



ანა ჭალიძე, 11 წლის –"ძალიან მომწონს აქ ყოფნა. წინა წელსაც ვიყავი და გავერთე, ძალიან კარგი იყო. ახლაც ბევრი ვითამაშეთ მე და ჩემმა მეგობრებმა“




საბა მერაბიშვლი, 9 წლის – "კარგად ვერთობი. ხელზე დავიხატე საქართველოს დროშა, რომ გავიზარდები მინდა ჯარში წავიდე“.




ნათია ნარიმანიშვილი – "9 წლის ვარ, მოგზაურობაზე ვოცნებობ. აქ მე და ჩემი და მოვედით, ძალიან მომწონს ეს დღე“.




მარიამ იაძე , 12 წლის – "ეს დღე მომწონს, განსაკუთრებით ხატვა. მინდა მომავალში ჟურნალისტი გამოვიდე“.

საბავშო ღონისძიებაზე რამდენიმე აქტივობა ერთდროულად მიმდინარეობდა. პატარებს საშუალება ჰქონდათ მონაწილეობა სპორტულ–გასართობი შეჯიბრებებში მიეღოთ, დაეხატათ თავისუფალ თემაზე, ფოტოები გადაეღოთ სპეციალურად განკუთვნილ გასართობ ბანერთან და კურდღლის ფორმაში გამოწყობილ მულტფილმის გმირთან, სურვილისამებრს მოეხატათ სახე და ხელები.

პარალელურად, ღონისძიებაზე მისული პატარებისა და მათი მშობლებისათვის პატარა კონცერტი მოეწყო. სხვადასხვა მუსიკალური და საცეკვაო ნომრები ახალციხის კულტურის სახლის აღსაზრდელებმა და ურავლის, მუსხის, კლდისა და ვალის სასკოლო კლუბებმა წარმოადგინეს.
ღონისძიება არასამთავრობო ორგანიზაციების WORLD WISION - საქართველოს სამცხე–ჯავახეთის სამხარეო განვითარების პროგრამისა და დემოკრატ მესხთა კავშირის (UDM) ერთობლივი ორგანიზებით გაიმართა, რომლის მხარდამჭერი ახალციხის მერიის კულტურის სამსახური იყო.

"სამცხე–ჯავახეთის სამხარეო განვითარების პროგრამა ამ დღესასწაულს ყოველ წელს აღნიშნავს. ჩვენი ორგანიზაცია მუშაობს ბავშვთა კეთილდღეობისათვის თემებში, აქედან გამომდინარე, ძალიან მნიშვნელოვანია ეს დღე რომ აღინიშნოს და მოვუწოდებთ ხალხს, რომ დაიცვან ბავშვების უფლებები“, – ამბობს სამცხე–ჯავახეთის სამხარეო განვითარების პროგრამის ახალგაზრდების განვითარების მიმართულების ხელმძღვანელი ალისა გიმიშიანი.

ღონისძიებაზე, სხვადასხვა აქტივობაში პატარებს ანიმატორობას სამცხე–ჯავახეთის სამხარეო გავითარების პროგრამის სასკოლო კლუბების წევრები და PITA–ახალციხის ახალგაზრდული ცენტრის ახალგაზრდები უწევდნენ.

"დემოკრატ მესხთა კავშირი ახორციელებს ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამას და ეს ღონისძიებაც სწორედ მის ფარგლებში მოვაწყეთ. გვინდოდა, რომ ეს დღე ბავშვებისთვის გაგვეფერადებინა“, – ამბობს პროექტის კოორდინატორი ნათია გელაშვილი.

შეგახსენებთ, რომ 1 ივნისის აღსანიშნავად, ახალციხეში კიდევ ერთი ღონისძიება 18:00 საათზე, ახალციხის ციხის ტერიტორიაზე გაიმართება.

[თაკო ფექირიშვილი, ახალციხე]