‘გავნადგურდით’ – სოფელი ვარხანი სტიქიიდან მეორე დღეს [PHOTO]

სოფელ ვარხანში მცხოვრებმა ბიჩახჩიანებმა გუშინდელი ღამე ღია ცის ქვეშ გაატარეს. მთელი ღამის განამავლობაში ოჯახის წევრები სახლის პირველ სართულს წყალდიდობის დროს შევარდნილი სილისგან წმენდნენ. ბიჩახჩიანები ამბობენ, რომ შევარდნილმა წყალმა საოჯახო ტექნიკა დაუზიანათ.

„სარეცხის მანქანა და მაცივარი განადგურდა. ტანსაცმელი, ავეჯი და კომპიუტერი წყალში ტივტივებდა“, – გვეუბნება მარინა ბიჩახჩიანი და ამატებს, რომ წყალმა ორი ოქროს ბეჭედიც გასტაცა, – „ოქრო „კამოდში“ მქონდა შენახული, წყალმა გადააყირავა, ალბათ გამოვარდა და დავკარგე“.

„ტანზე რაც მაცვია, ეს ტანსაცმელი დამრჩა. დანარჩენი წყალმა წაიღო“, – ამბობს შოთა ბიჩახჩიანი.

წყალდიდობამ ბიჩახჩიანებს სხვა კუთხითაც მიაყენა ზარალი.

„8 გოჭი და 8 ქათამი დამეხრჩო“, – ამბობს მარინა.



ბიჩახჩიანები გამონაკლისები არ არიან. წყალი შევარდა მინაძეების სახლშიც.

„11 ქათამი გამტაცა წყალმა. სარდაფში შემოვარდნილმა ნიაღვარმა ქატო, ფქვილი, ლობიო და 100 კილოგრამი პურის მარცვალი გამინადგურა“, – გვეუბნება ბეგლარ მინაძე.

ადიდებულმა ოცხემ მინაძეებს ნათესებიც დაუტბორა.

„20 მეასედზე სიმინდი, ლობიო, კარტოფილი და პომიდორი მომყავდა. ეს იყო ჩვენი შემოსავალი“, – ამბობს ბეგლარი და ამატებს, – „გამგებელი იყო მოსული, თვითონაც წუხან და გვპირდებიან დაგეხმარებითო“.

ცისანა დემეტრაძე სტიქიის დროს სახლში მარტო იყო. ამბობს, რომ წყლის შეკავებას ცდილობდა, თუმცა უშედეგოდ: „ჭიშკარი შემოგლიჯა, სახლის კარს ვაწვებოდი წყალი რომ შემეკავებინა, მაგრამ ვერ შევძელი“.



დღეს დილიდან ცისანა დემეტრაძეს ქუთაისიდან შვილები ჩამოუვიდნენ და სახლიდან წყლის ამოტუმბვაში ეხმარებიან.

მეზობლების მსგავსად, წყალდიდობის გამო კარტოფილის, სიმინდისა და ლობიოს ნათესები გაუნადგურდათ და შინაური ფრინველები დაეხრჩოთ კუპრაძეებს.

„ 30 წიწილა დამეხრჩო. კარტოფილის, ლობიოსა და სიმინდის მოსავლის იმედი მქონდა, ცოდოები ვართ“... – ამბობს ანტონ კუპრაძე.
მოვარდნილი ნიაღვრისგან დასილულია გორგოძეების სახლის ეზო და საქონლის სადგომი.

„ნაწილი ქათმები დამეხრჩო ნაწილი კი, ეზოშია ჩასილული. ავეჯი აღარ მივარგა“, – ამბობს ლიანა გორგოძე.




სტიქიის დროს მეზობლებს დახმარებისთვის ეძახდა ჟუჟუნა გორგოძე, რომელიც იმ დროს სახლში მეუღლესთან ერთად იყო: „მეუღლეს ფეხი აქვს მოტეხილი და გარეთ ვერ გამოდის. ყველაფერი წყალში ჩაგვეყარა“...



„მთელი ყანა წაიღო , 35 წიწილა დამეხრჩო. იმხელა წყალი იყო, წიწილა კი არა, მე კინაღამ წამიღო. გავნადგურდით, ამდენი ნაწვალები წყალში ჩაგვეყარა“, – გვეუბნება კიდევ ერთი დაზარალებული ია იაკობაძე.

სტიქიიდან მეორე დღეს ვარხანში მცხოვრებლებმა ჯერ ისევ არ იციან ზუსტად, რა ზარალი მიიღეს. დასილულ სახლებსა და ავეჯს ჯერ ახლა წმენდენ და ასუფთავებენ. თუმცა, სახლებისგან განსხვავებით, ჯერ ვერ შედიან დატბორილ ნათესებში.

„ჯერ ისეც ამდენი წვიმაა მავნებელი ნათესებისთვის, ამ დატბორვის მერე კი ან გადარჩება რამე და ან არა“, – ამბობენ ვარხანში.
აგროდაზღვევით აქ თითქმის არავინ სარგებლობს, ყოველ შემთხვევაში არავინ მათგან, ვინც ჩვენ ჩავწერეთ, შესაბამისად, მათ ამ კუთხით მიყენებულ ზარალსაც არავინ აუნაზღაურებს.

„მშივრები ვრჩებით“, – ამბობენ ვარხანში და მოღრუბლულ ცას უიმედოდ უყურებენ. მათი იმედი მაინც სახელმწიფოს დახმარებაა, თუმცა, როგორც სამცხე–ჯავახეთის გუბერნიაში ამბობენ, სავარაუდოდ ადიგენში მხოლოდ ინფრასტრუქტურის მიმართულებით მიყენებული ზარალი ანაზღაურდება.

შეგახსენებთ, ძლიერმა წვიმამ ადიგენში გუშინ 9 სოფელი დააზარალა, მათგან, სოფელი ვარხანი განსაკუთრებით. ზარალს ადიგენის გამგეობაში შექმნილი კომისია სწავლობს. გამგეობაში ამბობენ, რომ ზარალის დათვლას რამდენიმე დღე დასჭირდება.



[ვარლამ წიკლაური, ახალციხე]