ახალციხის სოფლებში წიგნები და ტანსაცმელი განაწილდება

სპორტისა და ახალგაზრდობის საქმეთა სამინისტროს პროექტების ფარგლებში, ახალციხის მუნიციპალიტეტს 3 000–მდე წიგნი და 2 000–მდე ერთეული ტანსაცმელი და ფეხსაცმელი გადაეცა. ეროვნული ბიბლიოთეკისა და სამინისტროს ერთობლივი საჩუქარი, 30 მაისს, ახალციხის ადმინისტრაციულ შენობაში განთავსდა.

პროექტების მიხედვით, წიგნები სოფლების ბიბლიოთეკებში უნდა გადანაწილდეს, ტანსაცმელი კი მზრუნველობამოკლებულ და სოციალურად დაუცველ ოჯახებს დაურიგდება.

"ჩვენ დავითვლით წიგნებს, ჩამოვწერთ ვის რამდენი სჭირდება და ისე გადავანაწილებთ. წიგნები იმ სოფელბს გადაეცემა, სადაც ბიბლიოთეკებია, ასევე განაწილდება ტანსაცმელი“, – ამბობს ახალციხის თემის კულტურული დაწესებულებების გაერთიანების დირექტორი გიორგი ჟუჟუნაძე.



სპორტისა და ახალგაზრდობის საქმეთა სამინისტროს ორივე პროექტმა სტარტი მაისის დასაწყისში აიღო და 5 თვის განმავლობაში გაგრძელდება. პროექტებისამინისტროს ახალგაზრდული პოლიტიკის მართვის დეპარტამენტის "მზრუნველობამოკლებული და სოციალურად დაუცველი ბავშვებისა და ახალგაზრდების მხარდაჭერის პროგრამის" ფარგლებში ფინანსდება.

„წიგნი ყველა სოფელს“ პროEქტის ფარგლებში ახალციხეში, გასულ წელს, 1800 ცალი სხვდასხვა ჟანრის მხატვრული ლიტერატურა ჩამოვიდა.

"მინდა ხალხს მოვუწოდო, რომ იაქტიურონ და "ვისოლის“ ბენზინგასამართ სადგურზე მოიტანონ წიგნები და ასევე ტანსაცმელი კომპანია "ფრეგოში“. ჩვენ ვპირდებით, რომ მივიტანთ მათ ადრესატამდე“, – ამბობს სტუდენტური ერთიანობის თავმჯდომარე ბექა ღაჟონია.



[თაკო ფეიქრიშვილი, ახალციხე]