ახალციხის მუნიციპალიტეტის ბიბლიოთეკებს საჩუქრად 1 800 წიგნი გადაეცა

1 800–მდე წიგნი ახალციხის მუნიციპალიტეტს საჩუქრად პროექტის „მოსიარულე ბიბლიოთეკა – წიგნი ყველა სოფელს“ ფარგლებში გადაეცა. წიგნები თბილისში განთავსებულ სპეციალურ ყუთებში გროვდება, რის შემდეგაც რეგიონებში ნაწილდება.

„აქციის მიზანს ახალგაზრდებში წიგნიერების დონის ამაღლება და მათი წიგნთან დაახლოება წარმოადგენს“, – ამბობს ახალგაზრდული მოძრაობა „დავითიანის“ წევრი დავით მღებრიშვილი.

ახალციხის მუნიციპალიტეტის კულტურის დაწესებულებათა გაერთიანებაში განმარტავენ, რომ წიგნები ძირითადად მუნიციპალიტეტში მომქედ ორ ბიბლიოთეკას გადაეცემა, რომლებიც აწყურსა და ვალეში ფუნქციონირებს.

„ასევე შევეხმიანებით სკოლის ბიბლიოთეკებს და მათი საჭიროებებიდან გამომდინარე, სად რა მოთხოვნა იქნება წიგნებს დავურიგებთ“, – განმარტავს ახალციხის მუნიციპალიტეტის კულტურის დაწესებულებათა გაერთიანების უფროსი გიორგი ჟუჟუნაძე.

პროექტი „მოსიარულე ბიბლიოთეკა – წიგნი ყველა სოფელს“ ბავშვთა და ახალგაზრდობის განვითარების ფონდის საგრანტო კონკურსის ერთ–ერთი გამარჯვებულია. აღნიშნული პროექტი საქართველოს პატრიარქის ლოცვა–კურთხევით 2014 წელს დაიწყო. როგორც აქციის ორგანიზატორები ამბობენ, პროექტის ფარგლებში საქართველოს სხვადასხვა სოფლებში არსებული ბიბლიოთეკების წიგნებით შევსება მომავალშიც გაგრძელდება.

[თამარ თოთაძე, ახალციხე]