სამცხე–ჯავახეთში ყოველ მესამე და მომდევნო ბავშვზე ფულად დახმარებას მიიღებენ

სამცხე-ჯავახეთი დემოგრაფიული მდგომარეობის გაუმჯობესების მიზნობრივ სახელმწიფო პროგრამაში ჩაერთო. პროგრამა, ყოველ მესამე და მომდევნო დაბადებულ ბავშვზე ოჯახისთვის, 2 წლის განმავლობაში ყოველ თვეში 150 ლარის გადარიცხვას გულისხმობს; მაღალმთიან დასახლებებში კი ეს თანხა 200 ლარი იქნება. დახმარება მხოლოდ 2017 წლის იანვრიდან დაბადებულებს შეეხებათ.

საქართველოს სტატისტიკის ეროვნული სამსახურის ინფორმაცით, აღნიშნული პროგრამა 2014 წლიდან გურიას, იმერეთს, კახეთს, მცხეთა-მთიანეთს, სამეგრელო–ზემო სვანეთს, რაჭა-ლეჩხუმს და ქვემო სვანეთს მოიცავდა. სამცხე–ჯავახეთი კი პროგრამაში 2017 წლის იანვრიდან ჩაერთო. მიზანი საქართველოში დემოგრაფიული მდგომარეობის გაუმჯობესების ხელშეწყობა და შობადობის მატერიალური წახალისებაა.

ფულად დახმარებას ადგილობრივები ფაქტობრივი საცხოვრებელი მისამართის მიხედვით მიიღებენ. მათ ამისთვის თავიანთ მუნიციპალიტეტებში არსებულ სოციალური მომსახურების სააგენტოს უნდა მიმართონ. განცხადებას თან უნდა ახლდეს: ბავშვის/ბავშვების მშობლების პირადობის დამადასტურებელი დოკუმენტები; კანონიერი წარმომადგენლის პირადობის დამადასტურებელი დოკუმენტი და კანონიერი წარმომადგენლობის დამადასტურებელი დოკუმენტი, თუ მიმართვას ახორციელებს მშობლების გარდა სხვა კანონიერი წარმომადგენელი; მაძიებლისა და სხვა შვილების დაბადების მოწმობები; სხვა დოკუმენტი, რომელიც საჭიროა სოციალური დახმარების უფლებრივი საკითხის გასარკვევად საჭიროების შემთხვევაში.

როგორც სოციალური მომსახურების სააგენტოს სამცხე-ჯავახეთის სოციალური მომსახურების სამხარეო ცენტრის სპეციალისტი ლევანი საანიშვილი ამბობს ამ ეტაპზე მათთან მხოლოდ ორი განაცხადია შესული. ,, ჯერჯერობით ინფორმაცია არაა საზოგადოებაში ფართოდ გავრცელებული“.

[მარიამ ბარძიმაძე, ახალციხე]