ასპინძელებს სუფთა წყალი ენატრებათ

დაბა ასპინძის მოსახლეობა, სასმელი წყლით მუნიციპალიტეტის ორი სოფლიდან: ოთიდან და ოშორიდან მარაგდება. ადგილობრივები ამბობენ, რომ გაუმართავი ფილტრაციის გამო, სასმელი წყალი ყოველთვის დაბინძურებული მოდის. განსაკუთრებით ცუდი მდგომარეობა გაზაფხულსა და შემოდგომაზეა. მათი თქმით, ონკანს ხშირად ფოთლები მოჰყვება.

”წყალთან დაკავშირებით მართლაც ცუდ დღეში ვართ ასპინძელები, გაუფილტავ და დაბინძურებულ წყალს ვსვამთ. დღეში ორი საათი მოდის და ვედროს რომ ავავსებთ, სილა და ფოთოლი მოჰყვება. ციხის უბანში კი უარესი მდგომარეობაა”,-ამბობს გულიკო ბუთხუზი.

ასპინძელები ამბობენ, რომ დაბალი წნევის გამო, წყალი ზოგ ქუჩებზე საერთოდ არ მოდის, ამიტომ წყლის მოტანა შორი მანძილიდან უწევთ.

”გოგებაშვილის ქუჩაზე ვცხოვრობ და ჩვენთან წყალი სერთოდ არ მოდის, კიდევ კარგი ახლოს ”ბაზრის წყარო” გვაქვს თორემ, რა გვეშველობოდა არ ვიცი”,- ამბობს ზურა ლეკიშვილი.

იმას, რომ ასპინძის მოსახლეობისთვის მთავარი პრობლემა სასმელი წყალია, საქართველოს გაერთიანებული წყალმომარაგების კომპანიის სამცხე-ჯავახეთის სერვისცენტრშიც ადასტურებენ. სერვისცენტრში ამბობენ, რომ თანამშრომლები ახლაც წყლის სათავეზე მუშაობენ. ძლიერი ყინვების გამო, სათავეზე ნელი წყლის ფილტრი გაიყინა და და მოსახლეობას გაუფილტრავი წყალი ამის გამო მიეწოდება.

” ჩვენი თანამშრომლები ძალ-ღონეს არ იშურებენ, რომ ფილტრის ამუშავება შეძლონ. ამჟამად ოთის სათავეზე იმყოფებიან და ყინულს ამტვრევენ, რომ ნელი ფილტრის ამუშავება შეძლონ. წყალი იფილტრება, მაგრამ, ისე როგორც საჭიროა ვერა”- განმარტავს საქართველოს გაერთიანებული წყალმომარაგების კომპანიის სამცხე-ჯავახეთის სერვისცენტრის მენეჯერი გიორგი ბაგინაშვილი.

სერვისცენტრში გვარწმუნებენ, რომ გაზაფხულიდან ასპინძის მოსახლეობას სუფთა წყალი ექნება და ეს პრობლემა სამუდამოდ მოგვარდება. წყალმომარაგების გაუმჯობესების მიზნით დაბაში სამუშაოები უკვე დაწყებულია.

ახალქალაქის მინიციპალიტეტის სოფელ ხანდოდან, წყლის ჩამოყვანას კომპანია ”აზერი”უზრუნველყოფს. პროექტს მუნიციპალური განვითარების ფონდი აფინანსებს. ამ ეტაპზე სამუშაოები სოფელ ხერთვისთან მიმდინარეობს. პროექტისთვის 1,800,000 ლარია გამოყოფილი.

როგორც წყალმომარაგების კომპანიაში ამბობენ, სამშენებლო სამუშაოები გაზაფხულზე დასრულდება. ამის შემდეგ ასპინძის მოსახლეობა 24-საათიანი მომარაგებით იქნება უზრუნველყოფილი.

მეორე ეტაპისთვის, ასპინძაში შიდა ქსელების სრული რეაბილიტაცია იგეგმება. ამისათვის პროექტი უკვე სატენდეროდაა მზად.

”მთლიანად შეიცვლება შიდა ქსელი, გარემონტდება წყლის რეზერვუარები და ასპინძას 24-საათიანი მომარეგება იქნება. ამ პროექტის ფარგლებში მოხდება გამრიცხველიანებაც”,-განმარტავს ბაგინაშვილი.

შეგახსენებთ, რომ ამ დრომდე ასპინძის მოსახლეობა წყლის გადასახადს არ იხდიდა.

[თინათინ ზაზაძე, ასპინძა]