წყალმომარაგების კომპანია: ახალციხეში მცხოვრებ 600 ოჯახს წყალი 24 საათი ექნება

საქართველოს გაერთიანებული წყალმომარაგების კომპანია და მუნიციპალური განვითარების ფონდი,ახალციხის მუნიციპალიტეტში წყალმომარაგების სისტემის რეაბილიტაციას ევროპის საინვესტიციო ბანკის დაფინანსებით ახორციელებს.პროექტის ღირებულება 2 მილიონ ლარამდეა.

მიმდინარე სამუშაოები დღეს საქართველოს გაერთიანებული წყალმომარაგების კომპანიის დირექტორმა, ვლადიმერ ლაზარიშვილმა ტენდერში გამარჯვებული სამშენებლო კომპანიის „ასნაფი“-ს პროექტის ხელმძღვანელთან ერთად დაათვალიერა და მშენებლობის ხარისხი შეამოწმა.

"წყლის ინფრასტრუქტურის რეაბილიტაციის შედეგად ახალციხის მუნიციპალიტეტში მცხოვრებ 600 ოჯახის 2 ათასზე მეტ ადამიანს წყლის გრაფიკისა და წყლის ხარისხის პრობლემა მოუგვარდება, კერძოდ, პროექტის განხორციელების შედეგად მნიშვნელოვნად შემცირდება წყლის დანაკარგები და გაუმჯობესდება, როგორც წყლის ხარისხი, ასევე წყლის მიწოდების გრაფიკი", – აცხადებენ წყალმომარაგების კომპანიაში.

ახალციხის მოსახლეობის დიდ ნაწილს, კერძოდ, 600 ოჯახს ამჟამად წყალი გრაფიკით მიეწოდება. კომპანიაში ირწმუნებიან, რომ პროექტის დასრულების შემდეგ 10-12 საათიანი გრაფიკი 24-საათიანი წყალმომარაგებით შეიცვლება. პროექტის განხორციელების შედეგად ახალციხის მოსახლეობას წლების განმავლობაში არსებული პრობლემა მოუგვარდება. პროექტის ფარგლებში მოხდება: 800 მ³ მოცულობის რეზერვუარის რეაბილიტაცია, ასევე გამანაწილებელი ქსელის მშენებლობა და რეაბილიტაცია საერთო სიგრძით 17,961 მ.

საქართველოს გაერთიანებული წყალმომარაგების კომპანია და მუნიციპალური განვითარების ფონდი ევროპის საინვესტიციო ბანკის დაფინანსებით მსგავს სამუშაოებს საქართველოს მასშტაბით 24 ქალაქში ახორციელებს. პროექტის საერთო ღირებულება ჯამში 100 მილიონ ლარზე მეტია.

[ნინო ნარიმანიშვილი, ახალციხე]