ორკვირიანი უწყლობის შემდეგ, ასპინძის ნაწილს წყლის მიწოდება აღუდგა

ოთის მაგისტრალური 60-მეტრიანი მილსადენის გაყინვის გამო, დაბა ასპინძის მოსახლეობის 80 პროცენტს სასმელი წყალი 2 იანვრიდან არ მიეწოდებოდა.

გაყინულ მილსადენს დაახლოებით ორი კვირის განმავლობაში სხვადასხვა საშუალებით ადნობდნენ, თუმცა საბოლოოდ გაყინული მილის ჩაჭრა გახდა აუცილებელი. ასპინძელებს წყლის მიწოდება დაახლოებით ხუთი დღის წინ აღუდგათ.

„ცენტრალურ მაგისტრალიდან გაყინული მილის ჩაჭრა მოხდა და პლასტმასის მილით გადავაერთეთ რეზერვუარში. მოსახლეობას ასე ვაწვდით წყალს. რაც სასმელი წყლის მიწოდება აღდგა, მას შემდეგ ქსელზე დავაერთეთ ასევე ახალი სასმელი წყალი, რომელიც სოფელ ხანდოდან მოგვეწოდება“,- ამბობს „საქართველოს გაერთიანებული წყალმომარაგების კომპანიის“ სამცხე-ჯავახეთის ფილიალის მენეჯერი გიორგი ბაგინაშვილი.

სასმელი წყლის გარეშე ასპინძაში ამ დრომდე მოსახლეობის მცირე ნაწილი რჩება. ეს მოსახლეობის ის ნაწილია, რომელიც წყალს იმ ტერიტორიიდან იღებდა, სადაც ცენტრალური მილსადენია გაყინული.
გიორგი ბაგინაშვილი ამბობს, რომ აღნიშნულ ოჯახებს წყლით ასპინძის სახანძრო-სამაშველო სამსახური ამარაგებს.

შეგახსენებთ, რომ ასპინძის მოსახლეობას სასმელი წყლის მიწოდება 2 იანვარს შეუწყდა. ადგილობრივებს წყალს ასპინძის სახანძრო-სამაშველო სამსახური ურიგებდა, თუმცა წყალი ყველა უბნისთვის საკმარისი არ იყო და გარდა ამისა, მისი გამოყენება მხოლოდ ტექნიკური მოხმარებისთვის შეიძლებოდა.

[თინათინ ზაზაძე, ასპინძა]