2013 წლის ბიუჯეტის განხილვა გრძელდება

რა ცვლილებები შევიდა 2013 წლის ადგილობრივი ბიუჯეტის პროექტში და რა შენიშვნები გაითვალისწინა საკრებულომ, - ამ საკითხებზე იმსჯელეს არასამთავრობო სექტორისა და ახალციხის მუნიციპალიტეტის საკრებულოს წარმომადგენლებმა დღევანდელ შეხვედრაზე.

საკრებულოს თავმჯდომარემ ოლეგ სანდროშვილმა აღნიშნა, რომ არასამთავრობო ორგანიზაციების ყველა შენიშვნა ვერ გაითვალისწინეს. თუმცა, მომავალი წლის დასაწყისში ბიუჯეტში გარკვეული ცვლილებები შევა და ეცდებიან, რომ სხვა შენიშვნებიც გაითვალისწინონ.

- ”ნაწილობრივ გავითვალისწინეთ ის მოთხოვნები, რაც ჰქონდა მოსახლეობას და არასამთავრობოებს. სიტყვას ვიძლევით, რომ მომავალი წლის დასაწყისში ცვლილებები კიდევ იქნება და გავითვალისწინებთ იმ აზრს და მოთხოვნებს, რომელიც ამ პერიოდში არ იქნა გათვალსწინებული”, - განმარტავს ოლეგ სანდროშვილი.

ადგილობრივ და საერთაშორისო არასამთავრობო ორგანიზაციებს 2013 წლის ბიუჯეტის პროექტთან დაკავშირებით გარკვეული შენიშვნები ჰქონდათ. ბიუჯეტის პროექტის საჯარო განხილვებისას მათ სპეციალური მიმართვა შიმუშავეს და მუნიციპალიტეტის საკრებულოს წარუდგინეს.

- ”2013 წლის ბიუჯეტში არ იყო გათვალისწინებული კონკრეტული მუხლი, რომელიც, საერთაშორისო ორგანიზაციებთან თანადაფინანასებისათვის გარკვეული თანხების გამოყოფას გულისხმობდა. ჩემი ორგანიზაციის შენიშვნაც კონკრეტულად ამ საკითხს ეხებოდა, რომელის გათვალისწინებაც მოხდა, - ამბობს არასამთავრობო ორგანიზაცია ”Mercy Corps”-ის გენდერული საკითხების კოორდინატორი ნინო ლომიძე და ამატებს, რომ როგორც საკრებულოს თავმჯდომარემ განმარტა, ბიუჯეტში გათვალისწინებულია კონკრეტული თანხა, რომელიც საზოაგდოებრივ ორგანიზაციებთან თანადაფინანსებას ითავლისწინებს: ერთი ფაქტი, რაც გასათვალისწინებელია არის ის, რომ ჩვენც, ანუ ორგანიზაციებმა ზუსტად არ ვიცით, რამდენი პროგრამა გვექნება მომავალ წელს და რა თანხის დაფინანსება იქნება საჭირო მუნიციპალიტეტის მხრიდან. ამიტომ, ეს გარკვეულწილად აფერხებს მათი მხრიდან კონკრეტული თანხის განსაზღვარას და გამოყოფას”.

არასამთავრობო ორგანიზაციები ბიუჯეტის განხილვაში აქტიურად პროექტ ”გამჭვირვალე თვითმმართველობის” ფარგლებში ჩაერთვნენ. რომელსაც არასამთავრობო ორგანიზაცია ”დემოკრატ მესხთა კავშირი” ახორციელებს. ახალციხის მუნიციპალიტეტის 2013 წლის ბიუჯეტის პროექტი მომავალ კვირაში დამტკიცდება.

[თამარ თოთაძე, ახალციხე]