საკრებულომ ბიუჯეტზე არასამთავრობოების კრიტიკა გაითვალისწინა

ახალციხის მუნიციპალიტეტის 2013 წლის ბიუჯეტის პროექტი 5,568.1 ლარით განისაზღვრა. პროექტის საჯარო განხილვა აქტიურად ჩაერთვნენ არასამთავრობო ორგანიზაციებიც. საჯარო განხილვების დროს სამოქალაქო სექტორის წარმომადგენლებმა რეკომნდაციები შეიმუშავეს და მუნიციპალიტეტს საკრებულოს გადაუგზავნეს. ახალციხის მუნიციპალიტეტის საკრებულოში განმარტავენ, რომ არასამთავრობო ორგანიზაციებისგან მიღებული შენიშვნების ნაწილი გათვალისწინებული იყო.

”მუნიციპალიტეტის გამგეობიდან შემოვიდა ბიუჯეტი, პარალელურ რეჟიმში ამაზე მუშაობა საკრებულომაც დაიწყო ამავდროულად ბიუჯეტის პროექტის განხილვაში აქტიურად ჩაერთვნენ არასამტავრობო ორგანიზაციებიც, მოგვწერეს შენიშვნები თხოვნის სახით, რათა გაგვეთვალისწინებინა გარკვეული საკითხები”, - განმარტავს ახალციხის მუნიციპალიტეტის საკრებულოს თავმჯდომარის მოადგილე მალხაზ ასპანიძე.

2013 წლის ბიუჯეტის პროექტში ცვლილებები შემდეგ საკითხებს შეეხო: 350 ათასი ლარით შემცირდა ააიპ ახალციხის ციხის დაფინანსება, რისთვისაც აქამდე ბიუჯეტის პროექტში 750 ათასი ლარი იყო გათვალისწინებული. შესაბამისად, გაიზარდა გამგეობის დაქვემდებარებაში მყოფი სხვა ააიპ დაწესებულებების დაფინანსება, რაც აღნიშნული დაწესებულების თანამშრომლებისთვის ხელფასის 30-პროცენტიან მატებას ითვალისწინებს.

ცვლილებები შევიდა სოციალურ პროგრამაშიც.

”პირველ რიგში, ბაღებში სწავლის გადასახადს შეეხო. ის, რაც ასპროცენტიანი შეღავათი გვქონდა დარჩა, მეორე ბავშვზე კი, რომელიც საბავშვო ბაღში დადის, შეღავათი 50 პროცენტი გახდა. მესამე და ყოველი მომდევნო ბავშვზე ასპროცენტიანი დაფინანსებაა გათვალისწინებული”, - განმარტავს ახალციხის მუნიციპალიტეტის საფინანსო-საბიუჯეტო სამსახურის უფროსი გაგა ივანიძე.

ცვლილებებია საოპერაციო ხარჯებთან დაკავშირებითაც. გეგმიურზეც და სასწრაფო-გადაუდებელ ოპერაციაზეც ადგილობრივი ბიუჯეტიდან დაფინანსება 50-პროცენტიანი გახდა. მაქსიმალური ზღვარი გეგმიური ოპერაციის შემთხვევაში ათასი ლარით, სასწრაფო-გადაუდებელ ოპერაციაზე კი 2,000 ლარით განისაზღვრა.
ცვლილება შეეხო მუნიციპალიტეტის ტერიტორიაზე მცხოვრები მშობიარეების დახმარების მუხლსაც.

”ნებისმიერ მოქალაქეზე მუნიციპალიტეტი მშობიარობის 50 პროცენტს დააფინანსებს”, - განმარტავს მალხაზ ასპანიძე.

ბიუჯეტის პროექტის შესწორებული ვარიანტი ახალციხის მუნიციპალიტეტის საკრებულოს 10 დეკემბერს გადაეცა. მალხაზ ასპანიძის განმარტებით, პროექტს კიდევ რამდენიმე დღის განმავლობაში განიხილავენ. ადგილობრივი ბიუჯეტის პროექტის საბოლოო ვერსია 20-დან 25 დეკემბრამდე დამტკიცდება.

[თამარ თოთაძე, ახალციხე]