ახალციხის სამოქალაქო სექტორმა 2014 წლის ბიუჯეტის განხილვა დაიწყო

ახალციხის მუნიციპალიტეტის 2014 წლის ადგილობრივი ბიუჯეტის პროექტი 7.284.600 ლარით განისაზღვრება. გამგეობის მიერ მომზადებული პროექტი უკვე განიხილა და შენიშვნებით უკან, გამგეობას გადაუგზავნა საკრებულომ. ამ ეტაპზე გამგეობის საფინანსო-საბიუჯეტო სამსახურში საკრებულოს შენიშვნებზე მუშაობენ.

პარალელურად, ბიუჯეტის პროექტის განხილვა დაიწყეს ადგილობრივმა არასამთავრობოებმაც. პირველ შეხვედრას, რომელიც დღეს, 2 დეკემბერს, "დემოკრატ მესხთა კავშირში" შედგა, სამოქალაქო სექტორის წარმომადგენლებთან ერთად გამგეობის საფინანსო სამსახურიდანაც ესწრებოდნენ.

„ბიუჯეტის ის ვარიანტი, რომელიც დღეს განვიხილეთ, ბოლომდე დამუშავებული არაა. ძალიან ბევრი ციფრი აკლია და სამწუხაროა, რომ ზოგიერთ მუხლში ადგილბრივი ბიუჯეტი ელოდება იმას, თუ რას დაუმტკიცებს ცენტრალური ბიუჯეტი. მართალია ამ ეტაპზე ბიუჯეტი არასრულყოფილია, მაგრამ მიუხედავად ამისა, ჩვენ გარკვეული შენიშვნები მაინც გვაქვს, რომელსაც ახალციხის მუნიციპალიტეტის საკრებულოს წერილობით მივაწოდებთ“, - ამბობს არასამთავრობო ორგანიზაცია „დემოკრატ მესხთა კავშირის“ ხელმძღვანელი გიორგი ანდღულაძე.

არასამთავრობოები ამ ეტაპზე კონკრეტულ შენიშვნებს არ ასახელებენ.

„ეს უნდა შეთანხმდეს კონკრეტულ ორგანიზაციებთან და მუნიციპალიტეტს ისე გადაეგზავნოს. რადგან ზოგიერთ შენიშვნას, რომელიც დღეს აქ გამოითქვა, შესაძლებელია სხვა ორგანიზაციები არ ეთანხმებოდნენ, ან მათ ჰქონდეთ კიდევ სხვა შენიშვნები. აქედან გამომდინარე, სანამ არ შევთანხმდებით საერთო წერილის ტექსტზე, იქამდე კონკრეტულ შენიშვნებზე ვერ ვისაუბრებთ“, - ამბობს გიორგი ანდღულაძე.

სამოქალაქო სექტორის წარმომადგენლებს იმედი აქვთ, რომ მომავალი წლის ბიუჯეტის დამტკიცების დროს ადგილორბივი თვითმმართველობის წარმომადგენლები მათ შენიშვნებს გაითვალისწინებენ.

„მსგავსი განხილვები გასულ წელსაც მოეწყო, ამ სამუშაო ჯგუფმა გარკვეული შენიშვნები წარვიდგინეთ და ბევრი მათგანი გაითვალისწინეს. ვფიქრობ, რომ ჩვენს შენიშვნებს წელსაც გაითვალისწინებენ“, - ამბობს გურამ ჯინჭველაძე.



[თამარ თოთაძე, ახალციხე]