2017 წლის ბიუჯეტის პროექტის საჯარო განხილვა იწყება

საბიუჯეტო კალენდრის მიხედვით, დღეს ბოლო ვადა იყო საკრებულოებისთვის ბიუჯეტის პროექტის გადასაგზავნად. წარდგენიდან 5 დღის ვადაში, საკრებულომ პროექტი საჯარო განხილვისთვის უნდა გამოაქვეყნოს.

მესხეთის მასშტაბით, ამ დროის მონაცემებით, ბიუჯეტში ყველაზე მეტი თანხა, – 14.000.700 ლარი, ბორჯომის მუნიციპალიტეტს აქვს; ყველაზე ნაკლები, – 3.000.550 ლარი, კი ასპინძას. ადიგენის მუნიციპალიტეტის 2017 წლის ბიუჯეტის პროექტი 4.171.900 ლარით განისაზღვრა; ახალციხის მუნიციპალიტეტის ბიუჯეტი კი, პროექტის მიხედვით, 6.320.000 ლარია.

ახალციხის ადგილობრივ თვითმმართველობაში განმარტავენ, რომ გასულ წელთან შედარებით თანხა 1.868.000 ლარითაა გაზრდილი.

„ბიუჯეტის გაზრდა ძირითადად მოხდა გადასახადების გაზრდით. იგულისხმება, როგორც ქონების გადასახადი, ასევე საშემოსავლო გადასახადი ფიზიკური პირებიდან“, – ამბობს ახალციხის მუნიციპალიტეტის საფინანსო–საბიუჯეტო სამსახურის უფროსი გელა ლომიძე.

ქალაქ ახალციხის ბიუჯეტის პროექტი 7.908.000 ლარით განისაზღვრა. ქალაქის საკრებულოს თავმჯდომარის დავით ლომიძის განმარტებით, საკრებულოს კომისიებს და ფრაქციებს პროექტი განსახილველად უკვე გადაეგზავნათ. ბიუჯეტის პროექტს გაეცნობიან არასამთავრობო ორგანიზაციები და სხვა დაინტერესებული პირები.

საკრებულომ ბიუჯეტის პროექტი, შენიშვნებით (მათი არსებობის შემთხვევაში), გამგეობას/მერიას 25 ნოემბრამდე უნდა დაუბრუნოს; აღმასრულებელი ორგანო კი შესწორებულ საფინანსო დოკუმენტს საკრებულოს უკან 10 დეკემბრამდე დაუბრუნებს.

[თინათინ ზაზაძე, ახალციხე]