სამცხე–ჯავახეთში ახალგაზრდების იდეები შეკრიბეს

ახალციხის, ბორჯომის, ადიგენის, ასპინძის, ახალქალაქისა და ნინოწმინდის ახალგაზრდები 23 მაისს, ახალციხის ცენტრალურ პარკში შეიკრიბნენ.

150–მდე ახალგაზრდამ ქვეყნის დეოკუპაციის, ევროპასთან ინტეგრაციისა და ქვეყნის ეკონომიკური განვითარების მისეული ხედვა და იდეები ფურცლებზე ჩამოწერა და ორგანიზატორებს გადასცა.

„ვფიქრობთ, რომ ქვეყნის განვითარებისთვის გარკვეული მიდგომები უნდა შევცვალოთ. ეს არის ძალიან კარგი მაგალითი იმისა, რომ გავახალისოთ ჩვენი ქვეყანა. სწორედ ახალგაზრდების იდეებია მნიშვნელოვანი“, – განაცხადა პარლამენტის წევრმა გიორგი ვაშაძემ, რომელმაც მაისის დასაწყისში „ერთიანი ნაციონალური მოძრაობა“ დატოვა და ახალი პარტიის ჩამოყალიბებას გეგმავს.

სამცხე–ჯავახეთში მცხოვრები ახალგაზრდები ინოვაციებისა და განვითარების ფონდის ორგანიზებით შეიკრიბნენ. ფონდიც გიორგი ვაშაძემ დააფუძნა, 2014 წლის თებერვალში.

ფონდის ორგანიზებით მსგავსი შეხვედრები მთელი საქართველოს მასშტაბით იმართება. ივნისში ფონდი ახალგაზრდების იდეების კრებულს გამოსცემს. მოგვიანებით საუკეთსო იდეებს საქართველოს პარლამენტს, ასევე ადგილობრივი თვითმმართველობის წარმომადგენლებს გააცნობენ.



[ვარლამ წიკლაური, ახალციხე]