გარესამყაროს მოწყვეტილები ლიფტების მოლოდინში

დავით აბდუშელიშვილი ახალციხეში, თამარაშვილის ქუჩაზე ცხოვრობს. შემთხვევა, რომელმაც ყოფილი მაიორი ეტლს მიაჯაჭვა, 6 წლის წინ მოხდა. იმ დღიდან მისი ცხოვრება რადიკალურად შეიცვალა და სხვა რიტმში გაგრძელდა.

„სასაზღვრო პოლიციაში ვმუშაობდი, 2011 წელს, მივლინებისას, მძღოლის დაუდევრობამ ამ დღეში ჩამაგდო“, – გვეუბნება და ამატებს, – „ბოლოს ეზოში გასული წლის სექტემბერში ვიყავი. მერიდება, ამხელა ვარ და ვინმეს ვუთხრა, რომ ხელით ჩამიყვანოს“.

დავითსგან განსხვავებით, გელა ბარძიმაძეს ახალციხის ქუჩებში ხშირად ნახავთ. გელა ცხრა აპრილის ქუჩაზე, მეორე სართულზე ცხოვრობს.
ამბობს, რომ მეგობრების დახმარებით ეზოში ჩამოსვლა მისთვის პრობლემა არ არის, თუმცა, ის ერთერთი გამონკალისია, ვიცას ამის ფუფუნება აქვს: „ჩვენს ქალაქში სამწუხაროდ საკმაოდ ბევრია ისეთი, ვისაც გადაადგილება უჭირს. ზაზა თამარაშვილი [ახალციხის მერის მოადგილე] დაგვპირდა , რომ შშმ პირებისთვის განკუთვნილ ლიფტებს გაგვიკეთებს. ამაზე საუბარი დიდი ხანია დაწყებულია“.



ლიფტის იმედი აქვს დავით აბდუშელიშვილსაც.

„შემპირდნენ... აზომეს, მითხრეს აღდგომამდე მზად იქნებაო... მერიიდანაც იყვნენ, მეზობლებისგან ნებართვაც აიღეს. დავუკავშირიდი რატომ იგვიანებთ–მეთქი და მითხრეს უსაფრთხებასთან დაკავშირებით მოსაგვარებელია საკითებიო“, – გვეუბნება დავითი.

იგი ამბობს, რომ ქალაქის ხელმძღვანელობისგან ეს დაპირება გასული, 2015 წლის დეკემბერში, შეზღუდული შესაძლებლობების მქონე პირთა უფლებების დაცვის საერთაშორისო დღეს მიიღო: „ჩემთან იყვნენ მერიიდან, საჩუქრები გადმოგვცეს და მაშინ ვთხოვე“.

ახალციხის მერიის ინფორმაციით ქალაქში ეტლით მოსარგებლე 30 პირი ცხოვრობს. მერიაში განმარტავენ, რომ სპეციალური ლიფტების გაკეთება ნამდვილად სურთ, თუმცა როდის და ვინ გააკეთებს, ჯერ გადაწყვეტილი არ არის. ამ ეტაპზე ცნობილი არც ისაა, რამდენ ბინაზე მოხერხდება კონსტრუქციის დამონტაჟება.

„გაჩნდა იდეა ადამიანებს, რომლებიც ვერ ახერხებენ გარეთ გამოსვლას, პირობა შევუქმნათ რომ არ იყვნენ სახლში ჩაკეტილი. ვნახეთ პიროვნება, რომელიც აკეთებს ამას და ტვირთის ასაზიდად იყენებს, სავარაუდო ხარჯთაღიცხვაც გავაკეთებინეთ. მაგრამ, პრობლემაა ის, რომ კუსტარულად მზადდება და ვინ იქნება უსაფრთხოებაზე პასუხისმგებელი რამე რომ მოხდეს?“ – ამბობს ახალციხის მერის მოადგილე ზაზა თამარაშვილი.



კონსტრუქცია, როგორზეც ახალციხის მერია საუბრობს, ასოციაცია „ტოლერანტშია“ დამონტაჟებული. ასოციაციის დირექტორის ცირა მესხიშვილის განმარტებით, ლიფტი“ შვეიცარიის საელჩოს დაფინანსებით დაამონტაჟეს. დაახლოებით 2,50–მეტრიანი კონსტრუქციით, შშმ პირს შეუძლია დაწესებულებაში ღილაკზე ერთი ხელის დაჭერით შევიდეს.

„მეორე სართულზე რომ შშმ პირი ამოგვეყვანა, 1300 ლარი დაჯდა ამის გაკეთება, მაღალ სართულებზე შედარებით ძვირი იქნება. რთულია ორგანიზაციის მოძებნაც, რომელიც ამას გააკეთებს. უსაფრთხო უნდა იყოს“, –ამბობს ცირა მესხიშვილი.



მისივე თქმით „ტოლერანტმა“ პანდუსებისა და ლიფტების საკითხი ადგილობრივ ხელისუფლების წინაშე დააყენა: „როგორც ვიცი, 4 ბინაზეა საუბარი, სადაც ეს „ლიფტები“ უნდა დაამონტაჟონ. უახლოეს პერიოდში მერის მოადგილეთან შეხვედრა გვექნება“.

ზაზა თამარაშვილი ამბობს, რომ შესაძლოა ე.წ „ლიფტის“ ნაცვლად კიბეებზე ასასვლელი მოწყობილობა დაამონტაჟონ, რაც შედარებით უსაფრთხო იქნება: „ფინანსების მხრივ პრობლემა არ გვაქვს. შესაძლებელია ბიუჯეტში ცვლილებები შევიტანოთ და ამისთვის თანხა გამოვყოთ. მაგრამ, მეხუთე სართულზე რამდენად შევძლებთ ამის გაკეთებას, არ ვიცით. მთავარია პირველი პრეცენდენტი შევქმნათ უსაფრთხო და გამართული სისტემის ჩამოყალიბების“.

შეძლებს თუ არა ახალციხის მერია მიმდინარე წელს ე.წ „ლიფტების“ დამონტაჟებას შშმ პირების საცხოვრებელ სახლებზე, ამ ეტაპზე ძნელი სათქმელია. გარესამყაროსგან მოწყვეტილ პირებს კი მერიის დაპირების შესრულების ძალიან სჯერათ.

„ეს დაპირება აძლიერებს“, – გვეუბნება ქმრისგან მალულად დავით აბდუშელიშვილის მეუღლე.



[თინათინ ზაზაძე, ახალციხე]