ეტლით მოსარგებლე პირებს უნივერსიტეტში გადაადგილება გაუადვილდებათ

სამცხე-ჯავახეთის სახელმწიფო უნივერსიტეტის პირველ კორპუსში, ეტლით მოსარგებლე პირებისათვის, ოთხივე სართულზე გადასაადგილებლად, დამონტაჟდება კიბის დახრილკუთხოვანი ლიფტი, ხოლო მეორე კორპუსში ლიფტი მხოლოდ პირველი სართულიდან ნულოვანი სართულის მიმართულებით დამონტაჟდება.

„არქიტექტორებმა გვირჩიეს, რომ გაკეთდეს არა ისეთი ლიფტი, რომელიც კონსტრუქციის მიშენებას საჭიროებს, არამედ სპეციალური ულტრათანამედროვე ლიფტი, რომელიც კიბეებზე დამონტაჟდება“, – გვითხრა უნივერსიტეტის რექტორმა მაკა ბერიძემ.

ორივე ლიფტი უნივერიტეტს 104 748 ლარი დაუჯდა.

უნივერისტეტის მიერ გამოცხადებულ ტენდერში მონაწილეობა ოთხმა კომპანიამ მიიღო. მათ შორის პირველად შერჩეულმა პრეტენდენტმა უარი განაცხადა ხელშეკრულების გაფორმებაზე. საბოლოდ კი, ტენდერი შპს „იმგომ“ მოიგო.

ლიფტების მონტაჟი ორივე კორპუსში მიმდინარე წლის ნოემბრის პირველ ნახევარში უნდა დასრულდეს.

შეგახსენებთ, რომ ლიფტის შესყიდვასა და მონტაჟზე უნივერისტეტმა მანამდეც გამოაცხადა ტენდერი, რომელშიც ერთი პრეტენდენტი მონაწილეობდა, მაგრამ მოგვიანებით, ტექნიკური დოკუმენტაციის არასრულყოფილების გამო, დისკვალიფიკაცია მიიღო.

[თორნიკე ზაზაძე, ახალციხე]