ახალციხეში შშმ პირები მერიისგან დაპირებულ ლიფტებს მეორე წელია ელიან

ახალციხეში მცხოვრები შშმ პირი დავით აბდუშელიშვილი „მარტივი ლიფტის“ დამონტაჟებას მეორე წელია ელოდება. თხოვნა, რომლის შესრულებასაც მერის უკვე ყოფილი მოადგილე, ზაზა თამარაშვილი ჯერ კიდევ 2015 წელს დაპირდა ამ დრომდე არ შესრულებულა.

ადგილობრივ თვითმმართველობას კუსტარულად დამზადებული მოწყობილობის ექსპლუატაციაზე პასუხისმგებლობის აღებას ფრთხილობს. კომპანია კი, რომელიც შშმ პირს კომფორტულ და თანამედროვე სტანდარტებით აღჭურვილ ლიფტს სთავაზობს, თვითმმართველობისთვის ძვირია.

„თბილისში არის ფირმა, მაგრამ ძალიან ძვირს ითხოვს. ფაქტობრივად ლიფტს აკეთებენ კორპუსში. 2–ს გაუკეთო და 4–ი ისე დარჩეს სწორად არ მიმაჩნია, ამიტომ შევიკავეთ თავი. ძალიან გვინდა, რომ გავაკეთოთ, აქტიურად ვეძებთ კომპანიას, რომელიც პასუხისმგებლობას აიღებს და ლიფტს დაამონჟებს“, – ამბობს ახალციხის მერის მოადგილე ზაზა გელაძე.

ვიდრე ახალციხის მერია ფიქრობს, გორში მსგავსი ტიპის ე.წ მარტივი ლიფტი უკვე დამონაჟდა და მეორე კვირაა მუშაობს კიდეც.
ლიფტის კონსტრუქცია გორში ადგილობრივმა შპს „ქონგური 2008–ამ“ გააკეთა .

„პირველად გავაკეთეთ „მარტივი ლიფტი“. პირველი სართულიდან ადის მეორე სართულზე. დასრულებული კონსტრუქცია თავად გორის მერიის ზედამხედველობის სამსახურმა ჩაიბარა“, – განმარტავს ვლადიმერ ახობაძე.

მისივე თქმით, რაც უფრო მაღალ სართულზეა დასამონტაჟებელი კოსტრუქცია, მისი ღირებულება შედარებით ძვირი იქნება. როგორც კომპანიის ხელმძღვანელი ვლადიმერ ახობაძე განმარტავს მარტივი არ არის, თუმცა არც შეუძლებელი.

ქალაქ გორის მუნიციპალიტეტის მერიამ ელიოზიშვილის ქუჩაზე მდებარე კორპუსში „მარტივი ლიფტის“ გასაკეთებლად ტენდერი 5 ოქტომბერს 2.300 ლარზე გამოცხადა. სწორედ აღნიშნული თანხით გაიმარჯვა კომპანიამ, რომელმაც გორში პირველი ე.წ „მარტივი ლიფტი“ დაამონტაჟა.
გორის ადგილობრივმა თვითმმართველობამ „მარტივი ლიფტი“ თანადაფინანსებით გააკეთა, თანხის მიცირე ნაწილი კორპუსის ამხანაგობამ გადაიხადა.

[თინათინ ზაზაძე, ახალციხე]