3 გასამართლებული და სახელმწიფოსთვის დაბრუნებული 1,5 მლნ–ის ქონება

ბაკურიანის მიწების გახმაურებულ საქმეზე პასუხისგებაში პროკურატურამ ოთხი პირი მისცა: კ. დიაკონაშვილი, მ. რობაქიძე, რ. გვალია და ე. ჩახალიანი. ოთხივე მათგანი იმ სიაშია, რომლის მიხედვითაც ახალციხის რაიონულმა სასამართლომ ტყეში 27 ნაკვეთი დააყადაღა.

ოთხი პირიდან სამს განაჩენი უკვე გამოუტანეს, ერთს, ჩახალიანს კი ამ დროისთვის აღკვეთის ღონისძიებად პატიმრობა აქვს შეფარდებული. ყველა მათგანს ბრალი თაღლითობასა (სსკ–ის 180–ე მუხლი) და ყალბი დოკუმენტის შეძენა–გამოყენებაში (362–ე მუხლებით) ედება.

დანაშაულებრივი გზით მიწის დასაკუთრების გამო, პროკურატურამ ბრალი პირველს კ. დიაკონაშვილს, 6 აპრილს წარუდგინა. მას გამოძიება სსკ–ის 180–ე და 362–ე მუხლებით გათვალისწინებული დანაშაულის ჩადენას ორ ეპიზოდში ედავებოდა. გამამტყუნებელი განაჩენი ახალციხის რაიონულმა სასამართლომ მას ბრალის წარდგენიდან მეორე დღესვე გამოუტანა. შესაბამისად, ბაკურიანის ტყეში რეგისტრირებული 10 000 კვადრატული მეტრი, რომლის ღირებულებაც 575 400 ლარს შეადგენდა, ჩამოერთვა.

დიაკონაშვილის შემდეგ, 14 აპრილს, პროკურატურამ იგივე მუხლებით ბრალი რ.გვალიას, წარუდგინა, ოღონდ ოთხ ეპიზოდში. ასევე, იმავე დღეს გამოუტანა გვალიას გამამტყუნებელი განაჩენი სასამართლომ. მას საკუთრებაში რეგისტრირებული ორი მიწის ნაკვეთი ჰქონდა. ერთის ოდენობა 4 502 კვადრატული მეტრი იყო, მეორესი კი 5 509; ამ ფართობების საერთო ღირებულება 545 004 ლარია.

ასევე ორი მიწის ნაკვეთი ჩამოერთვა, სასამართლოს გადაწყვეტილებით, ბრალდებულ მ. რობაქიძეს. იგი პასუხისგებაში 12 მაისს მისცეს. სასამართლომ რობაქიძე დამნაშავედ ოთხ ეპიზოდში, მეორე დღეს, 13 მაისს სცნო. ამდენად 4 510 და 4 000 კვადრატული მეტრი მიწის ფართობები, რომელთა ღირებულებაც 345 952 ლარი იყო, ჩამოართვეს.

სამივე მათგანთან საპროცესო შეთანხმება გაფორმდა. ბრალდებული ჩახალიანის საქმეს კი ახალციხის რაიონული სასამართლო ამ დრომდე იხილავს. ბრალდებულს საკუთრებაში რეგისტრირებული ორი მიწის ნაკვეთი აქვს, მათი ღირებულება 577 817 ლარია.

„ჩახალიანი მზადაა საპროცესო გაუფორმონ, მაგრამ არ უფორმებენ. მას უნდოდა, რომ მისი ადვოკატი ვყოფილიყავი, მაგრამ შეაშინეს. ამ ადამიანებმა მხოლოდ ის დააშავეს, რომ ბაკურიანელები არიან. პროკურატურას ისე გამოჰყავს საქმე, რომ თითქოს მათ ბორჯომის გამგეობის თანამშრომლები და სხვა პირები მოატყუეს და მიწები ისე დაისაკუთრეს. ეს სიმართლეს არ შეესაბამება“, – ამბობს ადვოკატი ირაკლი ბარძიმაძე.

რას გადაწყვეტს სასამართლო ჩახალიანთან მიმართებაში, ჯერ უცნობია. დანარჩენ სამ ბრალდებულს კი გამამტყუენებელი განაჩენი არ გაუსაჩივრებია.

„ეს იმას ნიშნავს, რომ ბრალს ეთანხმებიან“, – აცხადებენ პროკურატურაში.

საგამოძიებო უწყება „სამხრეთის კარიბჭეში“ გამოქვეყნებულ სტატიასაც ეხმაურება: „აქ რომ აცხადებენ, თითქოს მიწებს უკან აბრუნებენ, ასე არაა. მათ, გამოძიების პროცესში, თავიანთი ინიციატივით მიმართეს საჯარო რეესტრს მიწის მიტოვებასთან დაკავშირებით, მაგრამ მიწას უკვე ყადაღა ედო და ის ვერც სახელმწიფოს და ვერც ვერავის სხვას ვერ გადაეცემოდა. ეს ნაკვეთები ახლაც მათ საკუთრებაშია რეგისტრირებული და განკარგვის უფლება არ აქვთ“, – ამბობს სამცხე–ჯავახეთის საოლქო პროკურორის მოადგილე გიორგი ბახტაძე.

მისივე თქმით, ასევე არ შეესაბამება სიმართლეს ადგილობრივების განცხადება იმის შესახებ, რომ თითქოს ის მიწები, რომლებიც ყადაღის დადებამდე დაირეგისტრირეს, გასულ წლებში მიწის რეფორმის დროს მათ გადაეცათ: „აქ მაშინაც ტყე იყო და ახლაც ტყეა. ამიტომ ამ ფართობებს მათ საკუთრებაში არავინ გადასცემდა“.

პროკურატურა ბაკურიანში მიწების დანაშაულებრივი გზით დასაკუთრების საქმეს 2007 წლიდან იძიებს. ძიება ბორჯომის მუნიციპალიტეტის გამგეობის თანამშრომელბის მიერ უფლებამოსილების შესაძლო გადამეტების ფაქტზე სსკ–ის 332–ე მუხლით დაიწყო. სწორედ აღნიშნული მუხლით დაწყებული ძიებისას გამოვლინდა ბაკურიანელების მხრიდან თაღლითობის ფაქტები.

„ძიება გრძელდება და პასუხისგებაში კიდევ არა ერთი პირი შეიძლება მიეცეს“, – აცხადებს ბახტაძე და ამატებს, რომ ძიება არა მხოლოდ იმ პირებთან მიმართებაში მიმდინარეობს, რომელთა მიწებსაც ყადაღა ადევს ,– „ძიება გრძელდება ბაკურიანში სხვა მიწების თაღლითურად დასაკუთრების შესაძლო ფაქტებზეც“.

შეგახსენებთ, ტყის ნაწილი ბაკურიანში, რომელიც დაახლოებით ერთი თვის ვადაში ადგილობრივებმა დაისაკუთრეს და ნაწილმა გაყიდა კიდეც, დაყადაღებულია. ამ დროისთვის ყადაღა მიწის 27 ნაკვეთს ადევს.

დღეს კი 18 მაისს, ბაკურიანში მცხოვრებლები პროკურატურასთან იმ მოთხოვნთ შეიკრიბნენ, რომ ოლქის პროკურორს შეხვედროდნენ. პროკურატურამ ამის შესახებ მათ წერილობით მიმართვა სთხოვა და დაპირდა, რომ პასუხს აუცილბელად მიიღებენ.

[თამუნა უჩიძე, ბორჯომი]