ბაკურიანელები პროკურორთან შეხვედრას ითხოვენ

პროკურატურის შენობასთან დაახლოებით 30–მდე ბაკურიანელი იმყოფება. ისინი ამბობენ, რომ პროკურორთან შეხვედრა და იმის გარკვევა სურთ, რატომ დაუყადაღეს საკუთრებაში არსებული მიწები.

როგორც შეკრებილებს განუცხადეს, ამ წუთებში პროკურორს მათთან შესახვედრად არ სცალია. ბაკურიანის მცხოვრებლებს სთხოვეს, შეხვედრის თაობაზე პროკურატურას წერილობით მიმართონ.

შეკრებილებთან იმყოფება სამი მათგანის ადვოკატი ირაკლი ბარძიმაძე. ადვოკატმა წერილი უკვე გაამზადა და პროკურატურაში შეიტანა. წერილში ბარძიმაძე შეხვედრის მიზანს განმარტავს.

როდის შეხვდება პროკურორი ბაკურიანის მცხოვრებლებს, ჯერ უცნობია. პროკურატურაში აცხადებენ, რომ პასუხს ასევე წერილობით აცნობებენ.

„არ ვიცით შეხვედრა როდის იქნება, დღეს თუ ხვალ. შესაძლოა ამ წუთებში პროკურორი მართლაც დაკავებულია. ვფიქრობთ, როგორც კი შეძლებს, მოისმენს მათ აზრს“, – ამბობს ადვოკატი ირაკლი ბარძიმაძე.

შეგახსენებთ, ტყის ნაწილი ბაკურიანში, რომელიც დაახლოებით ერთი თვის ვადაში ადგილობრივებმა დაისაკუთრეს და ნაწილმა გაყიდა კიდეც, დაყადაღებულია. ამ დროისთვის ყადაღა მიწის 27 ნაკვეთს ადევს. ბაკურიანის მიწების საქმეზე დაწყებულია გამოძიება, სისხლის სამართლის კოდექსის 332–ე მუხლით. პროკურატურა ბორჯომის გამგეობის თანამშრომლების მხრიდან უფლებამოსილების შესაძლო გადამეტების ფაქტს იძიებს.

[sknews.ge]