პროკურატურასთან შეკრებილი ბაკურიანელები დაიშალნენ

სამცხე–ჯავახეთის საოლქო პროკურატურა ბაკურიანში მცხოვრებმა ათობით ადგილობრივმა იმ იმედით დატოვა, რომ მათ რეგიონის პირველი პროკურორი შეხვდება და აუხსნის, თუ რატომ დააყადაღა პროკურატურამ მათ საკთრებაში არსებული ქონება.

„ახლა აქ ცოტა ვართ, უფრო მეტი მოდიოდა ბაკურიანიდან. თუ საჭირო გახდა, მთელი დაბა აქ ჩამოვა“, – აცხადებენ შეკრებილები, რომლებსაც საკუთრებაში რეგისტრირებული ნაკვეთები მიმდინარე წლის თებერვალში დაუყადაღეს.

როგორც „სამხრეთის კარიბჭეს“ სამცხე–ჯავახეთის საოლქო პროკურატურაში განუცხადეს, მიწების დაყადაღება სასამართლოს განჩინებით მოხდა: „ჩვენ ვიშუამდგომლეთ სასამართლოში, ეს იყო ჩვენი პოზიცია, რომ ამ მიწებს ყადაღა დადებოდა და შუამდგომლობა დაკმაყოფილდა. ასე სასამართლომ გადაწყვიტა“.

ყველა ბაკურიანის მკვიდრმა, რომელის მიწასაც ყადაღა ადევს, ახალციხის რაიონული სასამართლოს განჩინება სააპელაციოში გაასაჩივრა.
„სააპელაციო სასამართლომ ახალციხის რაიონული სასამართლოს გადაწყვეტილება ძალაში დატოვა“, – აცხადებენ პროკურატურაში.

შეგახსენებთ, დღეს 18 მაისს, ბაკურიანში მცხოვრებლები პროკურატურასთან იმ მოთხოვნთ შეიკრიბნენ, რომ ოლქის პროკურორს შეხვედროდნენ. პროკურატურამ ამის შესახებ მათ წერილობით მიმართვა სთხოვა და დაპირდა, რომ პასუხს აუცილბელად მიიღებენ.

შეგახსენებთ, ტყის ნაწილი ბაკურიანში, რომელიც დაახლოებით ერთი თვის ვადაში ადგილობრივებმა დაისაკუთრეს და ნაწილმა გაყიდა კიდეც, დაყადაღებულია. ამ დროისთვის ყადაღა მიწის 27 ნაკვეთს ადევს. ბაკურიანის მიწების საქმეზე დაწყებულია გამოძიება, სისხლის სამართლის კოდექსის 332–ე მუხლით. პროკურატურა ბორჯომის გამგეობის თანამშრომლების მხრიდან უფლებამოსილების შესაძლო გადამეტების ფაქტს იძიებს.





[თამუნა უჩიძე, ახალციხე]