ბაკურიანის მიწების საქმეზე კიდევ ერთი პირი დააკავეს

დიაკონაშვილის, რობაქიძის, გვალიასა და ჩახალიანის შემდეგ, პროკურატურამ 1982 წელს დაბადებული ა. ბოლოთაშვილის სისხლის სამართლებრივი პასუხისმგებლობის საკითხი დააყენა.

იგი ბაკურიანში დღეს, 24 მაისს დააკავეს. გამოძიება ბოლოთაშვილს ე.წ. კოხტა გორის მიმდებარე ტერიტორიაზე დიდი ოდენობით სახელმწიფოს კუთვნილი ფართობის მოტყუებით და თაღლითურად მისაკუთრებას ედავება. საუბარია 4 000 კვადრატულ მეტრზე, რომლის ღირებულებაც 259 448 ლარია.

იგი თაღლითობასა (სსკ–ის 180–ე მუხლი) და ყალბი დოკუმენტის შეძენა–გამოყენების (362–ე მუხლებით) ბრალდებით დააკავეს. მას გამოძიება 362–ე მუხლის ბ ქვე პუნქტით გათვალისიწნებულ დანაშაულს სამ ეპიზოდში ედავება.

დაკავებულს ამ დრომდე ბრალი არ წარდგენია. პროკურატურაში აცხადებენ, რომ შესაძლოა მას ბრალი დაუმძიმდეს, რადგან საქმე სხვა ნაკვეთებსაც ეხება.

ბოლოთაშვილი ერთ–ერთია იმ 27–კაციანი სიაში, რომელთა ნაკვეთებსაც ყადაღა ახალციხის რაიონულმა სასამართლომ მიმდინარე წლის 24 თებერვალს დაადო.

შეგახსენებთ, სამცხე–ჯავახეთის საოლქო პროკურატურამ თაღლითობასა (სსკ–ის 180–ე მუხლი) და ყალბი დოკუმენტის შეძენა–გამოყენების (362–ე მუხლებით) ბრალდებით გარდა ბოლოთაშვილისა პასუხისგებაში ბოლო ორი თვის განმავლობაში კიდევ ოთხი პირი მისცა.

ტყის ნაწილი ბაკურიანში, რომელიც დაახლოებით ერთი თვის ვადაში ადგილობრივებმა დაისაკუთრეს და ნაწილმა გაყიდა კიდეც, დაყადაღებულია. ყადაღა ამ დროისთვის 46 ნაკვეთს ადევს.

[თამუნა უჩიძე, ახალციხე]