”ორხელისუფლებიანობა” ახალციხის უნივერსიტეტში

ახლად დანიშნული რექტორის მოვალეობის შემსრულებელი ჯერ უნივერსიტეტის თანამშრომლებისთვის ოფიციალურად არ წარუდგენიათ.

”ქალბატონ თინას შევხდი დღეს, ვისაუბრეთ. ეს მსუბუქი ადამიანური პროცესია, დიდი ხანია ჩვენ ვიცნობთ ერთმანეთს და მეგობრები ვართ. ხვალ ან ზეგ შევკრებთ თანამშრომლებს და გავისაუბრებთ მათთანაც”, - გვითხრა სამცხე-ჯავახეთის სახელმწიფო სასწავლო უნივერსიტეტის ახლად დანიშნულმა რექტორის მოვალეობის შემსრულებელმა მერაბ ბერიძემ.

ჯერ გადადგომის შესახებ უნივერსიტეტის რექტორის მოვალეობის შემსრულებელს თინა გელაშვილს განცხადება არ დაუწერია. ამ დრომდე დაკავებული თანამდებობიდან გათავისუფლების შესახებ მას არც ბრძანება მიუღია.

”გათავისულფების საფუძვლები ნამდვილად არ ვიცი. ბატონმა მერაბმა მომიტანა მთავრობის განკარგულება, მაგრამ ეს რომ ძალაში შევიდეს, ჯერ მას საჯარო რეესტრში გატარება უნდა. ჯერ-ჯერობით არ მაქვს ეს დოკუმენტი და თუ ვინმე მოგვიტანს, მადლობას ვეტყვით, რადგან დროს ტყუილად აღარ დავკარგავ”, - გვითხრა გელაშვილმა.

მას ჯერ გადაწყვეტილი არ აქვს სასწავლებელში დარჩება თუ არა: ”არაა გამორიცხული უნივერსიტეტიდან წავიდე, დღეს გავიგე ეს ამბავი და ჯერ გადაწყვეტილი არ მაქვს”.

ბერიძე კი სამომავლო გეგმებზე საუბრობს და ამბობს, რომ სასწავლებლის რეორგანიზაციის შემდეგ რიგით პირველი პრიორიტეტი ახალქალაქსა და ახალციხეში, ორი სრულფასოვანი და თანაბრად მაღალკვალიფიციური სასწავლებლების ჩამოყალიბებისათვის მუშაობაა.

[თამუნა უჩიძე, ახალციხე]