აწყურში მდინარეში გადავარდნილი მამაკაცის ძებნა განახლდა

ახალციხის სახანძრო–სამაშველო სამსახურის უფროსის პაატა კბილაშვილის თქმით, სამძებრო სამუშაოებში ბორჯომის სამაშველო ჯგუფებიც ჩაერთვნენ.

მაშველები სოფელ ზიკილიაში მცხოვრებ, 60 წლამდე ასაკის მამაკაცს, ისევ ახალციხე – ჩითახევის მონაკვეთში ეძებენ.

შეგახსენებთ, გუშინ, 15 მაისს, საღამოს, ახალციხეში, სოფელ აწყურთან, ავტომობილი მდინარის ნაპირას გადავარდა. „ნივის“ მარკის ავტომობილში სოფელ ზიკილიაში მცხოვრები ცოლ–ქმარი ისხდა. მანქანა წყალში ჩავარდგნისგან ხეებმა იხსნა, ქალი ავარიას გადაურჩა და მსუბუქი დაზიანებები მიიღო, მძღოლი კი მდინარეში ჩავარდა და წყლის ნაკადმა გაიტაცა. მაშველები მას გუშინ რამდენიმე საათის განმავლობაში, გვიან ღამემდე ეძებდნენ.

მომხდარს შინაგან საქმეთა სამინისტრო იკვლევს.

[sknews.ge]