წინასაახალწლო სამზადისი ახალციხეში

ქალაქში წელს გასულ წელს შეძენილ ნაძვისხეს დადგამენ

გასული წლისგან განსხვავებით, წელს განათებები თითქმის ყველა ქუჩაზე გაკეთდება. ადგილობრივ ხელისუფლებაში განმარტავენ, რომ მოსართავების უმეტესობა ახალია. გამოიყენებენ გასულ წელს შეძენილ აქსესუარებსაც.

ქალაქის მორთვა-გალამაზებაზე წელსაც შპს „კეთილმოწყობა“ ზრუნავს. აღნიშნული სამსახურის უფროსი ამირან ნოზაძე ამბობს, რომ ქუჩების მორთვა 25 დეკემბრამდე დასრულდება.

ქალაქის მოსართვად ადგილობრივი ბიუჯეტიდან 30,800 ლარია გამოყოფილი. გარდა ამისა, 1,700 ლარის ღირებულების საჩუქრები გადაეცემა უმწეოთა სასადილოს 170 ბენეფიციარს. 5,700 ლარი კი სკოლებისა და სკოლამდელი დაწესებულებების მოსწავლეების საჩუქრებისთვის დაიხარჯება.

ნაძვის ხის დადგმა 25 დეკემბრისთვისაა დაგეგმილი.

„დაიდგმება ძველი ნაძვის ხე. ისეც ძვირადღირებულია და საჭიროდ აღარ ჩავთვალეთ ახლის შეძენა“, - გვეუბნება ახალციხის მუნიციპალიტეტის გამგებლის მოადგილე ზაზა ხუციშვილი.

კულტურის სამსახურის უფროსის იური ზარიძის განმარტებით, დაგეგმილია საახალწლო კონცერტის გამართვაც, რომელშიც ადგილობრივი ანსამბლები მიიღებენ მონაწილეობას.

[ბექა რეხვიაშვილი, დათო ანდღულაძე, ახალციხე]