ახალციხის მთავარი საახალწლო ნაძვის ხე განათდა [Photo]

ახალციხის ცენტრალურ პარკში მდებარე ბუნებრივი ნაძვის ხე, რომელიც საახალწლოდ მორთეს, დღეს, 24 დეკემბრის საღამოს გაანათეს. ნაძვის ხის განათება სიმბოლურად ახალციხის მერმა, გიორგი კოპაძემ ჩართო.

განათების ცერემონიალისთვის ცენტრალურ პარკში თვითმმართველობის თანამშრომლები და მოქალაქეები შეიკრიბნენ. ნაძვის ხის განათების შემდეგ, ქალაქის მერმა პატარებთან სამახსოვრო ფოტო გადაიღო.

შეგახსენებთ, ახალციხეში საახალწლო სამზადისზე 46.277 ლარი დაიხარჯება. ამ თანხაში შედის საჩუქრების შეძენა ახალციხის მეშვიდე სკოლის 31 მოსწავლისთვის. მათ მერია 28 დეკემბერს ესტუმრება. ასევე საჩუქრების შეძენა იმ პატარებისთვის, რომლებისთვისაც 31 დეკემბერს, შუადღეს, ახალციხის ცენტრში საახალწლო წარმოდგენა გაიმართება. ამ პატარებს 31 დეკემბერს, 18:00 საათზე დაასაჩუქრებენ. მერიაში განმარტავენ, რომ საჩუქრებს 500 ბავშვისთვის ამზადებენ.

ქალაქის მორთვა უკვე დაწყებულია და 25 დეკემბერს უნდა დასრულდეს. სამუშაოებს შპს "ამირან ნოზაძე" ასრულებს.













[ვარლამ წიკლაური, ახალციხე]